Sot ka rënë kulmi i objektit të komunës së Prishtinës që ndodhet në lagjen “Arbëria”, ku lëndime ka pësuar një vajzë, e cila tashmë është duke iu nënshtruar një operacioni.
Këtë ka konfirmuar zëdhënësi për media në SHSKUK, Shpend Fazliu.
Ai tha se pas operacionit e reja do të transferohet në Mjekin Intensiv për trajtim të mëtutjeshëm.
“Ju konfirmojmë se aktualisht, pas CT-së së 2-të kontrolluese, pacientja po i nënshtrohet një operacioni nga neurokirurgët në sallën emergjente. Pas operacionit pritet të transferohet në Mjekim Intnesiv Qendror për trajtim të mëtejmë”,tha Fazliu për Express.
Tashmë Komuna e Prishtinës ka njoftuar se nesër nuk do të punohet në objektin e komunës që gjendet në lagjen “Arbëria”. Në njoftim thuhet se vendimi është marrë për shkak të sigurisë së qytetarëve dhe sanimit të kulmit të objektit, shkruan Gazeta Express.
“Me konstatim të Drejtorisë për Siguri dhe Emergjenca të Kryeqytetit, ju njoftojmë se nesër nuk do të punohet në objektin e komunës e cila gjendet në lagjen “Arbëria”. Ky vendim është marr për shkak të sigurisë së qytetarëve dhe me qëllim të sanimit të infrastrukturës së kulmit të objektit”,thuhet në njoftim.
