Kryesindikalisti i minatorëve të “Trepçës”, Ibrahim Januzi ka thënë se 11 minatorët që u lënduan nga acidi sulfurik të mërkurën në minierën e Trepçës janë liruar nga Spitali i Mitrovicës ndërsa 2 janë ende duke u trajtuar për shkak të lëndimeve më serioze në sy, por që janë jashtë rrezikut për jetë.
Në një lidhje telefonike për Radio Dukagjinin, Januzi ka thënë se incidenti i djeshëm ka ndodhur gjatë transportimit të acidit që shërben për pastrimin e gypave, ku si pasojë 13 minatorëve u ka rënë acidi sulfurik.
“Ka qenë një aksident gjatë transportimit të acidit që shërben për pastrimin e gypave, ku është derdhur acidi sulfurik dhe kanë marrë lëndime 13 minatorë, ku 2 prej tyre janë në gjendje më të rëndë. Të tjerët që janë liruar kanë probleme me frymëmarrje, ndërkaq këta 2 kanë lëndime më të rënda në sy, shpresojmë të tejkalojnë këtë dhe të i kthehen normalitetit”, ka thënë Januzi.
Ai ka thënë se për shkak të mungesës së kushteve në minierë, minatorët po i bartin pastaj pasojat.
“Zëri jonë po heshtet, kjo ka ndodhur për shkak të mungesës së kushteve elementare, për të cilat pasojat po i vuajnë minatorët”, ka vijuar ai.
Ai u ka bërë thirrje institucioneve relevante që të mos vizitojnë minatorët vetëm në momente kritike, por të reflektojnë dhe të investojnë në minierën e Trepçës.
Ndryshe, dje rreth orës 13:00, ka ndodhur një incident në Minierën e Trepçës, ku ka pasur rrjedhje kimike të acidit sulfurik, dhe si pasojë janë lënduar 13 minatorë.
