Komisioni Qendror i Zgjedhjeve ka mbajtur mbledhjen e radhës ku ka marrë vendim për pezullimin e një partie politike, përcjell InLajmi.
KQZ ka pezulluar Partinë Rome e Bashkuara e Kosovës, PREBK pasi e cila nuk ka mbajtur kuvendin e saj zgjedhor sipas afatit ligjor, ku afati i fundit për mbajtjen e kuvendit, konventës zgjedhore ka qenë data 6 janar 2024.
Sipas KQZ-së, PREBK obligohet që ta mbajë kuvendin e saj zgjedhor në një afat shtesë prej 45 ditësh dhe nëse kjo nuk arrihet, atëherë sipas rregullores për regjistrimin dhe funksionimin e partive politike, komisioni merr vendim për çregjistrim nga regjistri i partive politike në Kosovë.
Këtë vendim e quajti diskriminim anëtari i KQZ-së nga radhët e VV-së, Sami Kurteshi, duke thënë se shkelje të ngjashme ka pasur edhe nga partitë tjera.
“Ky është rasti i disa partive që pezullohet për këtë, një rast e kemi pas me të njëjtat kushte dhe nuk e kemi pezulluar dhe dua ta theksoj se jemi duke bërë diskriminim në rrethana të njëjta për kushte të ndryshme. Kjo është rast klasik i diskriminimit”, u shpreh ai. /InLajmi/
