Ndahet nga jeta në moshën 71 vjeçare shkrimtari i njohur Adem Gashi, shkruan InLajmi.
Lajmin e bënë të ditur familjarët e tij.
Varrimi i Ademit bëhet sot (e Martë) në ora 15:00 në fshatin Nekoc, Drenas.
I ndjeri ishte ish i burgosur politik dhe punoi gjatë edhe në media, por shkrimi ishte pasioni i tij.
Pas luftës ai pati jë varg angazhimesh edhe në fushën e politikës, kurse ishte edhe kryetari i Lidhjes së Shkrimtarëve të Kosovës deri në vitin 2005.
Gashi ka lindur më 18.10. 1953 në Nekoc të Gllogocit, shkollimin fillor në Nekoc dhe Komoran, shkollën Normale në Prishtinë.
Studimet për Letërsi dhe Gjuhë Shqipe në Fakultetin Filozofik të Universitetit të Prishtinës, ku ka ndjekur edhe studimet pasuniversitare, por është detyruar t’i ndërpresë për shkak të burgosjes, më 1982.
Më 1973 zë punë si arsimtar në shkollën e fshatit, në Nekoc.
Më 1977 punësohet në Radiotelevizionin e Prishtinës.
Më 1996, bashkë me Enver Malokun, punon në redaksinë e revistës ORA, ku publikon një seri të eseistikës politike dhe të vështrimeve letrare.
Po më 1996 emërohet drejtor i Televizionit në Tiranë, për Programin satelitor, deri më 1999.
Më 1999 emërohet drejtor i Radiotelevizionit të Kosovës, duke e hapur atë për herë të parë në Kosovën e lirë.
Më 1999 zgjidhet nënkryetar i Shoqatës së Shkrimtarëve të Kosovës, deri më 2001, kur zgjidhet kryetar, tashti i Lidhjes së Shkrimtarëve të Kosovës, deri më 2005.
Më 2001 fiton bursën 4 mujore të fondacionit gjerman “Heinrich Böll-Stiftung” me qëndrim në shtëpinë e nobelistit Bëll, në Langenbroich (Gjermani).
Më 2002 emërohet Këshilltar i lartë politik i ministrit të Kulturës, Rinisë dhe Sportit.
Më 2006 emërohet Drejtor i Zyrës për Komunikim në Ministrinë e Tregtisë dhe Industrisë, ku është edhe tani.
Publikim të parë e ka poezinë “Pranvera”, botuar në “Pionieri” (1966). /InLajmi/
