Brenda vjeshtës së këtij viti, Xhamia e Plumbit në Shkodër do të jetë gati për besimtarët dhe vizitorët.
Lajmin e bëri të ditur sot kryeministri Edi Rama, i cili u shpreh se punimet po ecin me ritme të shpejta për ta kthyer aty ku i takon këtë objekt kulti të veçantë, të cilësuar si një ndër 50 monumentet më të bukura të botës.
Xhamia e Plumbit në Shkodër është një ndër objektet e kultit më të rëndësishme jo vetëm në Shqipëri, por dhe në Ballkan.
Aktualisht ajo po i nënshtrohet një rikonstruksioni të plotë, që synon edhe mbrojtjen nga përmbytjet.
Xhamia e Plumbit është ndërtuar në vitit 1773-1774 nga Mehmet Pashë Bushatliu.
Ajo është shpallur Monument Kulture në vitin 1973 dhe është e vetmja xhami e ngelur në këtë zonë nga periudha osmane.
Ndërhyrja e fundit në këtë xhami është bërë në vitin 1865, pas përmbytjes së madhe të Shkodrës, shkruan ATSH.
Restaurimi i kësaj xhamie po bëhet pas një marrëveshjeje të lidhur me palën turke.
