Ish-ambasadori i misionit të OSBE-së në Kosovë William Walker, ka kujtuar 25-vjetorin e Masakrës së Reçakut, duke bërë homazhe në nderim të viktimave civile shqiptare, të vrarë nga regjimi serb, raporton InLajmi.
Walker tha se vjen të nderoj fshatin Reçak, të përshëndes miqtë e tij, familje nga fshati Reçak, ndërsa u shpreh se disa prej tyre i njeh që 25 vite, dhe disa fatkeqësisht kanë ndërruar jetë.
Ish-ambasadori tha se është hera e parë që vjen me shkop, por prapë do të jetë në Reçak në çdo rast që mundet, duke thënë se është shumë emocionuese.
Walker u shpreh krenar që ndodhet në mesin e familjarëve të viktimave në këtë ditë.
“Kjo nuk është vizita ime e parë në Reçak, mendoj se është e 21, 22 apo 23. Unë vij të nderoj fshatin Reçak, vij të përshëndes miqtë e mi, familje nga fshati Reçak, disa prej tyre i njoh prej 25 vitesh, disa fatkeqësisht kanë ndërruar jetë. Kjo është hera e parë që duhet të vij me shkop, por prapë dua të jem në Reçak në çdo rast që mundem. Për mua është shumë emocionuese. Është një histori e mrekullueshme për të cilën populli i këtij fshati fatkeqësisht është dashur të sakrifikojë shumë djem të fshatit. Ju tani keni një Republikë të Kosovës, një president, një kryeministër, një demokraci plotësisht funksionale dhe jam shumë krenar që jam këtu me ju në këtë vend që do të thotë shumë për mua, për popullin e Reçakut dhe për të gjithë Kosovën”, është shprehur ai. /InLajmi/
