Të kesh një shtatzani pas një tumori nuk nënkupton domosdoshmërisht se situata do të përkeqësohet, por gjithsesi duhet të kemi parasysh tipin e tumorit dhe ecurinë e trajtimit, terapitë e ndjekura, moshën e gruas si edhe gjendjen e saj pas rikuperimit. Në përgjithësi këshillohet të pritet 1-2 vite nga përfundimi i trajtimit para se të mendohet në lidhje me ngjizjen e fëmijës pasi duhet të merret në konsideratë edhe fakti se sëmundja mund të rishfaqet brenda këtij harku kohor.
Pas një trajtimi anti-tumoral mundësia për të pasur abort spontan do të jetë më e madhe por nuk rritet rreziku për keqformime të lindura tek fëmija. Prandaj gruaja shtatzanë duhet të jetë nën kontrollin e vazhdueshëm të mjekut, shkruan Përnënat.al.
Një mënyrë ngjizje
Nëse shtatzania nuk ka ndodhur në mënyrë natyrale pas trajtimit apo nëse gruaja ka zgjedhur më herët të ngrijë vezët e saj, mund të vazhdohet ngjizja me anën e metodave artificiale. Edhe sipas të dhënave të ekspertëve të publikuara në “Corriere.it”, shtatzania pas një tumori nuk ka pse të refuzohet. E madje sipas tyre ushqyerja me gji rekomandohet edhe pas nderhyrjes kirurgjikale. Tek gratë që kanë pasur tipin e tumorit Her 2 negativ mendohet se shtatzania do të reduktojë rrezikun për t’u sëmurur sërish krahasuar me gratë e tjera. Sipas ekspertëve që kanë ndjekur për 10 vjet gratë që kanë kaluar një tumor dhe më pas një shtatzani, kjo e fundit nuk e rrit mundësinë që qelizat tumorale të zhvillohen sërish edhe në rastet e tumoreve tip Her 2 pozitiv.
