Ministri i Punëve të Jashtme në mandat teknik dhe kryetar i Partisë Socialiste të Serbisë, PSS Ivica Daçiq, duke komentuar njoftimin e ambasadorit amerikan Christopher Hill se SHBA do t’i dorëzojë Kosovës sistemet anti-tanke Javelin, tha se Serbia nuk ka ndërmend të bëjë luftë, por nëse do të donte të bëjë luftë, “Kosovën nuk do ta ndihmoin as edhe një million “Javelina”, transmeton InLajmi.
Ai shtoi se është koha që Serbia të vendos nëse Kosova është çështje e saj kombëtare apo jo.
Daçiq kritikoi Kishën Ortodokse Serbe, për refuzimin e pranimit të vizitës së Papës në Serbi, sepse beson se ndikimi i Vatikanit është jashtëzakonisht i rëndësishëm në botë, duke theksuar se Vatikani (tani për tani) nuk e ka njohur pavarësinë e Kosovës.
“Kisha Ortodokse Serbe duhet të reagojë në lidhje me vizitën e Papës, sepse është e rëndësishme që ne të ruajmë mbështetjen e Vatikanit”, tha Daçiq.
Ai shtoi se rreth kësaj çështjeje duhet të arrihet homogjeniteti kombëtar.
Duke komentuar njoftimin për dorëzimin e sistemeve anti-tanke “Javelin”, Daçiq tha se ky rast nuk mund të shihet i izoluar.
“Bëhet fjalë për një partneritet strategjik afatgjatë për të ndihmuar pavarësinë e Kosovës. Gjithçka që ka ndodhur që nga viti 1999 duhet të merret parasysh. Epo, e njëjta Amerikë, por edhe të tjerat e armatosën UÇK-në. Dhe tani po bëjnë të njëjtën gjë”, tha Daçiq.
Ai shtoi se armatosja e Kosovës është e qartë “që synon forcimin e pavarësisë së Kosovës përmes forcimit të strukturave të saj të sigurisë”.
Daçiq po ashtu ka theksuar se kjo është në kundërshtim me Rezolutën 1244, por Serbia nuk ka se si ta kundërshtojë.
“Serbia duhet të zhvillojë marrëdhënie me ato vende që e njohin pavarësinë e Kosovës dhe jo vetëm që e njohin atë, por edhe që punojë në promovimin e saj, madje edhe ta armatosin atë. Ne duhet, sepse duam të ruajmë paqen dhe stabilitetin”, tha Daçiq në TV Pink.
Daçiq ka komentuar edhe deklaratën e ministrit të Jashtëm britanik, David Cameron, se “Serbia është përfaqësuese e Rusisë”, duke thënë se arsyeja e vetme për një deklaratë të tillë është se Serbia nuk ka vendosur sanksione ndaj Rusisë. /InLajmi/
