Ministria e Mbrojtjes ka thënë për televizionin se përveç sistemeve raketore “Javelin” që do të ngrisin kapacitetet e FSK-së, janë në proces të blerjes së armatimeve tjera. E dhënia e dritës së gjelbër për Kosovën për “Javelin” po konsiderohet si një mesazh për Serbinë që të jetë e kujdesshme në raport me Kosovën.
Janë armët më të sofistikuara e që përdoren nga ushtria më e fortë në botë, ajo amerikane.
E këto të tilla, së shpejti pritet që të jenë edhe në sirtarët e Forcës së Sigurisë së Kosovës.
Nga Ministria e Mbrojtjes thanë për televizionin se blerja e raketave anti-tanke Javeline, do t’i ngrisin kapacitetet e ushtrisë së Kosovës.
“Sigurisht blerja e sisteme të tilla moderne të armatimit do të ngrisë kapacitetet e FSK-së në përmbushjen e detyrës së saj kushtetuese në mbrojtjen e territorit të Kosovës dhe garantimin e sigurisë për të gjithë qytetarët e vendit”.
Po ashtu, nga ky dikaster u bë e ditur se këto nuk janë armët e vetme që po blihen, pasi në proces të blerjeve janë edhe të tjera.
“Jemi në proces të blerjes me disa shtete por që në këtë fazë nuk mund të ndajmë detaje të tjera me ju, e rëndësishme është që investimet do të vazhdojnë dhe se janë më të shumta se kurrë. Nga 3.6 milionë që është investuar përgjatë periudhës 2018-2020, vetëm sistemet ’Javeline’ që do të blihen këtë vit arrijnë vlerën 70 milionë dollarë, për të mos përmendur pastaj 239 milionë euro që veçse janë investuar gjatë periudhës 2021-2023”, thuhet nga Ministria e Mbrojtjes, shkruan Tëvë1.
E ish-koloneli i FSK-së vlerëson se dhënia e lajmit nga ambasadori amerikan në Serbi për këto sisteme raketore, është mesazh për Serbinë që të jetë e kujdesshme në raport me Kosovën.
Teksa shton se deklarimet publike për blerje të tilla mund të kenë efekte negative.
Për këtë marrëveshje, ka reaguar edhe presidentja, Vjosa Osmani e cila u shpreh se Kongresi Amerikan do ta mbështesë kërkesën e Kosovës dhe se kjo do ta rrisë sigurinë në vendin tonë.
