Instituti GAP prezantoi të premten Raportin “Prirja për të emigruar nga Kosova pas liberalizimit të vizave: Ndikimi në fuqinë punëtore”, i cili raport shpërfaqi tendencat e larta të migrimit, transmeton InLajmi.
Gjetjet e raportit tregojnë se tendencat për migrim në fillim të vitit janë të larta.
“Nga 1.000 të anketuar, 28% e tyre planifikojnë të emigrojnë në Zonën Shengen në tremujorin e parë të këtij viti. Ndërsa nga viti 2012 deri në vitin 2022, nga Kosova kanë migruar 338.000 qytetarë apo 18.8% e popullsisë së Kosovës”.
Ndërkohë që arsyet kryesore që i përmendin qytetarët janë kushtet ekonomike, ndërsa sektorët që do të preken më shumë janë ndërtimtaria, hoteleria dhe gastronomia.
Blendi Hasaj, hulumtues i lartë në GAP, u shpreh se Instituti ka bërë një hulumtim ku ka anketuar mbi 1000 persona, ku sipas kësaj gjetje pritet që 28% e popullësi të emigroj gjatë periudhës së parë të këtij viti.
“Fokusi jonë ka qenë me ato dinamika që pritet të ndodhin ne tregun e punës. Për të parë se cilët sektorit do të ndikohen më shumë, cila është zgjidhja, gjithashtu kemi analizuar se çka janë nxitësit kryesor që qytetarët janë duke emigruara dhe çfarë të ardhurash kanë familjet e tyre. Sipas statistikave të ASK-së nga viti 2012 deri në vitin 2022, nga Kosova kanë emigruar 338.000 qytetarë, 18.8 % e popullsisë së Kosovës. Instituti GAP ka kryer një hulumtim të opinionit publik, në kuadër të këtij hulumtimi janë anketuar 1066 respodentë, një gjetje kryesore e kësaj ankete është se nga përgjigjet, del se 28% e tyre planifikojnë që në tre mujorin e parë të vitin 2024 që të emigrojnë në zonën Shengen”, tha Hasaj.
Anisa Zogaj, hulumtuese e lartë në GAP, tha se sektorët që do të preken më shumë nga emigrimi i popullsisë janë sektori i ndërtimtarisë, sektori i hotelerisë dhe gastronomisë, sektori i tregtisë dhe sektori i prodhimtarisë.
Ajo tha se Gjermania është destinacioni kryesor i emigruesve dhe se kushtet ekonomike janë ndër arsyet kryesore që i nxisin qytetarët që të emigrojnë.
“Vetëm në vitin 2022 kanë emigruar 41.553 qytetarë dhe në këtë vit fuqia punëtore aktive është zvogëluar për 21.571 persona, ndërsa fuqia punëtore jo-aktive është zvogëluar për 14.698. Sektorët që priten të preken në masë të madhe nga largimi i punëtoreve, sektori i ndërtimtarisë do të prekte me 18.7%, sektori i hotelerisë dhe gastronomisë 18.7% sektori i tregtisë 18.1% dhe sektori i prodhimtarisë 12.9%. Shumica e qytetarëve që pritet të emigrojnë janë ata që kanë kryer shkollën e mesme”, tha Zogaj.
