Kryeministri i Kosovës, Albin Kurti, së bashku me Kryeministrin e Irlandez, Leo Varadkar, theksuan se marrëdhëniet me Irlandën sa vijnë e thellohen, përcejll InLajmi.
Kurti shprehet se jemi mirënjohës për mbështetjen e palëkundur të Irlandës në çlirimin, pavarësinë dhe zhvillimin e vendit tonë.
Po ashtu kryeministri shton se Kosova mund të mësojë nga përvoja dhe ekspertiza e Irlandës me diasporën, si dhe në sektorë si bujqësia, energjia e ripërtëritshme dhe teknologjia.
Njoftimi i plotë i tij:
Marrëdhëniet tona me Irlandën sa vijnë e thellohen. Ishte kënaqësi ta mirëpres kryeministrin irlandez, Leo Varadkar, në vizitën e tij të parë në Kosovë.
Vendet tona janë të lidhura fortë për vlera të përbashkëta të demokracisë dhe një histori të qëndrueshmërisë dhe rezistencës. Jemi mirënjohës për mbështetjen e palëkundur të Irlandës në çlirimin, pavarësinë dhe zhvillimin e vendit tonë.
Kosova mund të mësojë nga përvoja dhe ekspertiza e Irlandës me diasporën, si dhe në sektorë si bujqësia, energjia e ripërtëritshme dhe teknologjia. Andaj, takimi i sotëm ishte një rast shumë i mirë për të diskutuar mbi mundësitë që i kemi para vetes për t’i thelluar raportet tona, sa në rrafshin ekonomik e tregtar, ashtu edhe në atë kulturor, politik dhe diplomatik./InLajmi/
