Bashkimi Evropian po pret që Kosova të ndërmarrë hapa për deeskalim të situatës në veri, në mënyrë që të hiqen masat e vendosura ndaj saj.
Ndërsa, Kosova pret heqjen e masave, derisa thotë se hapat janë ndërmarrë.
Lidhur me këtë, njohësi i çështjeve politike, Halil Matoshi, në një prononcim për Gazeta Blic, thotë se Qeveria i di detyrimet e saj, dorëheqja e kryetarëve në veri, shpallja e zgjedhjeve atje dhe nisja e themelimit të Asociacionit.
“Qeveria Kurti i di saktë detyrimet që i ka, si dorëheqja e kryetarëve shqiptarë të komunave në veri të Kosovës dhe shpallja e zgjedhjeve të jashtëzakonshme atje, si dhe nisma e themelimit të Asociacionit të Komunave me Shumicë Serbe dërgimin e draft-Statutit në Gjykatën Kushtetuese për testim apo edhe dekretimin e tij!? Por, duke qenë se ai nuk ka opozitë që reziston ose e vë nën presionin kohë dhe duke qenë se qytetarët janë në një amnezi të thellë, ai po sillet si një izolacionist i epokës se Luftës së Ftohtë duke ia humbur vendit shumë vjet”, shprehet ai.
Sipas Matoshit, Kurtin për rastin e Banjskës e ndihmuan aleatët, teksa shton se ai nuk di dhe s’do zgjidhje politike.
“Aleatët e ndihmuan Kurtin në përballje me inkursionin Serbian në Banjskë me besimin që operacionin policor do ta pasonte me ndonjë hap politik veriu i Kosovës është problem politik dhe do zgjidhje politike!, por Kurti nuk ka, nuk di dhe nuk do zgjidhje politike!? Pothuajse njëjtë qëndron edhe Vuçiç. Matanë kufirit, duke mirëmbajtur politikat e konfliktit. Por me Serbinë lë të merren SHBA, Hill dhe BE”, vlerëson analisti për Gazeta Blic.
Ai potencon se Kurti mbijeton politikisht me fabrikim të konflikteve, derisa shton me politika të tilla ka rrezik që aleatët t’ia kthejnë shpinën Kosovës dhe të mbetet pa mbështetje financiare nga SHBA e BE.
“Kurti mbijeton politikisht përmes fabrikimin të konflikteve duke e homogjenizuar shoqërinë kosovare rreth nacionalizmit. Me këso politikash konfliktuale Kosova rrezikon që aleatët t’ia kthejnë shpinën dhe të mbetet pa mbështetje financiare nga BE dhe SHBA, deri buzë urisë! Ndonëse, deri tash ia humbur rreth 400 milionë euro donacione. Të jesh ndër pak vende në truallin evropian nën sanksione e të sillesh si fitues, ky është Albin Kurti dhe vulgus-i i tij!”, deklaron Halil Matoshi.
Ndërsa, analisti politik, Gazmir Raci, thotë se Kosova që disa muaj po zbaton marrëveshjen për deeskalim ttë situatës në veri dhe se masat duhet të hiqen.
“Republika e Kosovës ka disa muaj që është duke e zbatuar marrëveshjen e Bratisllavës për de-eskalim të situatës në katër komunat në veriun e vendit. Prezenca e Njësive Speciale të Policisë së Kosovës është në ulur në masë të madhe, situata e sigurisë për momentin që është nën kontroll të policisë dhe se procesi i shpalljes së zgjedhjeve të parakohshme është duke ndodhur sepse qytetarët konform udhëzimit janë duke i mbledhur nënshkrimet. Këto masa duhen hequr ndaj Kosovës sepse që nga fillimi ishin të njëanshme. Edhe Kryetari i Komunës në Leposaviq tashmë ka filluar edhe të dalë nga zyra, pasi që pati shumë kritika që ai është barrikaduar brenda në ndërtesë. E ndërkohë po raportohet se serbët në atë komunë kanë filluar të pranojnë edhe shërbime komunale”, thekson analisti.
Ai thotë se Serbia nuk po ndëshkohet për sulmin e Banjskës e as për mos zbatim të marrëveshjeve.
“Kurse në anën tjetër e kemi Serbinë e cila ende nuk po ndëshkohet për mbështetjen e dhënë ndaj terroristeve që e sulmuan Kosovën me 24 shtator të vitit të kaluar. Radojçiq dhe grupi i tij ende janë në liri dhe nuk duket që shteti serb nuk do t’i nxjerr para drejtësisë ata. Serbia po ashtu nuk po e zbaton Planin Franko-Gjerman dhe aneksin e Ohrit ajo madje e ka dorëzuar edhe një letër zyrtare në Shërbimin për Politikë të Jashtme të BE-së ku ka shfaqur mos gatishmëri të zbatimit të obligimeve nga marrëveshja e Brukselit”, vlerëson Raci.
Ai shton se kusht për integrim në BE të Serbisë duhet të jetë njohja de facto e Kosovës.
“Njohja de facto duhet të jetë kusht për Serbinë për integrim në BE ashtu siç e proklamuan edhe liderët e Gjermanisë, Francës dhe Italisë pas takimit të fundit të nivelit të lartë të dialogut në Bruksel vitin e kaluar”, deklaron analisti Gazmir Raci.
