Zëdhënësi i BE-së, Peter Stano, ka thënë se ende presin që Kosova t’i përmbushë kushtet e kërkuara, në mënyrë që Bashkimi Evropian t’i heqë masat e vendosura ndaj Kosovës.
Lidhur me këtë, deputeti i Lëvizjes Vetëvendosje, Gramos Agusholli, në një prononcim për Gazeta Blic, thotë se kur u vendosën masat, u tha se po bëhen për shkak të sjelljes jo evropiane, ndërsa tani thotë se s’janë bërë hapa të mjaftueshëm.
“Unë, me sa kujtoj, kur u mor vendimi për të vendosur sanksione ndaj Kosovës, zëdhënësi i BE-së argumentoi se masat ishin të nevojshme për shkak të sjelljes jo-evropiane. Megjithatë, tani ai thekson se vendet anëtare ende nuk kanë parë hapa të mjaftueshëm nga Kosova për de-eskalarizim të plotë”, shprehet ai.
Deputeti kujton se ndaj grupeve terroriste për sulmin e shtatorit në veri s’janë vendosur ende sanksione.
“Ndërkaq, për grupet terroriste që sulmuan Kosovën në shtator të këtij viti, ende nuk janë vendosur sanksione, pasi hetimi i tyre është në pritje. Unë besoj se shteti ynë është angazhuar mjaftueshëm në dialog, sidomos tani me fillimin e zbatimit të marrëveshjes për targat. Kjo mund të sjellë ndryshime pozitive dhe të ndihmojë në normalizimin e marrëdhënieve”, vlerëson Agusholli.
Ndërsa, lidhur me paralajmërimet se mund të ketë sanksione të reja ndaj Kosovës, ai thotë se nuk e beson që do të bëhet një tjetër padrejtësi ndaj Kosovës.
“Nuk besoj. Përderisa Kosova vazhdon angazhimin dhe zbatimin e kërkesave të BE-së nuk dua të besoj që do te na bëhet një padrejtësi e radhës”, deklaron deputeti i VV-së, Gramos Agusholli.
