Kryetari i Aleancës për Ardhmërinë e Kosovës, AAK, duket i brengosur për vitin që shkoi dhe “fajëson” qeverisjen aktuale që viti 2023 është i humbur, sepse sipas tij çdo segment i jetës ka qenë i dështuar, përcjell InLajmi.
Haradinaj, shprehet se as edhe një vit si 2023 nuk mbahet mend në Kosovë të ketë qenë më i dështuar, duke filluar nga marrdhëniet ndërkombëtare që siç thotë ai ka regres, sanksione e ndëshkime nga aleatët strategjik.
Tutje shprehet Haradinaj se gjatë vitit që shkoi Kosova nuk pati asnjë njohje, asnjë ivestim të huaj, disfatë në raport me Serbinë e rrezikim të pavarësisë.
Për më tepër ai përmend edhe dështimin në zhvillim ekonomik, arsim, shëndetësi e me afera korruptive.
Sipas tij, të gjitha këto dështime nuk mund të kalojnë pa ndëshkim.
Postimi i plotë i Haradinajt:
Nuk mbahet mend që Kosova ta ketë pasur një vit më të humbur se sa vitin 2023! Me dështime në çdo segment të jetës e të politikës.
Regres në pozicionin ndërkombëtar të Kosovës; sanksione e ndëshkime nga aleatët strategjikë; asnjë njohje, asnjë investim i huaj; disfatizëm në raport me Serbinë e rrezikim i pavarësisë së Kosovës; rritje enorme e çmimeve në artikujt elementarë, në energji, në tatime, në artikuj bazë ushqimor; dështim në investime e në zhvillim ekonomik; në arsim e në shëndetësi; me pagat më të ulëta në rajon; me afera të pazbardhura korruptive me rezervat shtetërore e tregtimin e energjisë; me luftë të paskrupullt ndaj gjyqësorit, me largimin masiv të rinisë nga vendi, e shumë të tjera.
Natyrisht edhe me pafytyrësinë e qeverisë që të gjitha këto dështime t’i paraqes si suksese.
Të gjitha këto dështime nuk mund të kalojnë pa ndëshkim. Prandaj sot, më shumë se kurrë kërkohet unitet e mobilizim që të ndalet rënia e shoqërisë dhe e shtetit./InLajmi/
