Kryetari i Komisionit Parlamentar për Kosovë, Milovan Drecun duke komentuar vizitën e ministrit të Jashtëm britanik, David Cameron në Prishtinë, tha se qëllimi kryesor i Britanisë së Madhe është të ndihmojë Kosovën në planin ushtarak, transmeton InLajmi.
Cameron tha në Prishtinë se Britania e Madhe do të ndihmojë Kosovën për njohje nga vendet që nuk e kanë njohur deri më tani, si dhe të ndihmojë për anëtarësimnë institucionet ndërkombëtare.
Drecun vlerësoi se Londra në këtë mënyrë po përpiqet të demonstrojë praninë e saj në rajon përmes Kosovës.
“Ata nuk duan të jenë një lojtar periferik gjeopolitik në këtë rajon, në të cilin shërbimi i tyre inteligjent është jashtëzakonisht aktiv. Britania e Madhe ka aktivitete shumë intensive në këtë rajon”, tha Drecun.
Mirëpo, siç tha ai, përkundër dëshirës së Britanisë së Madhe për të treguar se qëndron e vendosur ndaj pavarësisë së Kosovës dhe ofron mbështetje, potenciali i Britanisë së Madhe për të siguruar disa njohje të reja për Prishtinën është ezauruar, shkruan tv.pink.
“Nga kjo vizitë shihet se synimi kryesor i Britanisë së Madhe është që të ndihmojë Kosovën në planin ushtarak. Dhe ky është thelbi i të gjitha atyre bisedimeve, ndonëse për këtë kemi shumë pak detaje, përveç disa deklaratave të përgjithshme”, tha Drecun. /InLajmi/
