Ministri i Mbrojtjes Millosh Vuçeviq theksoi se futja e shërbimit ushtarak do të jetë pozitive për të gjithë shoqërinë dhe do të jetë ndryshe nga shërbimi ushtarak i mëparshëm, transmeton InLajmi.
“Lidhur me temën që dominoi dje në media, në vitin 2011, qeveria e atëhershme mori vendim për ngrirjen e shërbimit të detyrueshëm ushtarak. Pas 13 vitesh duke pasur parasysh rreziqet me të cilat po përballet vendi ynë, Shtabi i Përgjithshëm i Serbisë dhe Ministria e Mbrojtjes i kanë bërë thirrje zyrtarisht Presidentit të Republikës dje dhe kanë nisur nismën për rikthimin e shërbimit të detyrueshëm ushtarak. Nëse shërbimi ushtarak rikthehet, propozimi është që ai të zgjasë deri në 4 muaj”, tha Vuçeviq, për Pink rs, ndërsa theksoi se duhet kohë për përgaditjet për të filluar me shërbimin ushtarak obligativ.
Ministri shprehet se nuk ka nevojë për panik meqë nuk është një rikthim në vitet 90-ta.
Ai kujtoi se edhe Gjermania po flet për rikthimin e shërbimit ushtarak në vitin 2027. Austria, Zvicra dhe Greqia kanë shërbimin ushtarak.
“Nëse kemi sukses në këtë, besoj se do të jetë shëruese për të gjithë shoqërinë. Ushtria e Serbisë nuk është në problem, nga 1 janari Ushtria ka rrogë 10 % më të lartë. Nuk është më e njëjta ushtri. Serbia fiton në paqe, ne nuk shkojmë në luftë, por duhet të ndiqni se çfarë po ndodh në rajon dhe në çështjen e Kosovës. Detyra e Ushtrisë së Serbisë është të përgatitet për skenarin më të keq dhe të shpresojë që ai të mos vijë kurrë. E përsëris, rikthimi i shërbimit ushtarak nuk është ftesë për asnjë konflikt, nuk është përgatitje për luftëra, por mbrojtje e shtetit”, tha përfundoi ministrja e Mbrojtjes. /InLajmi/
