Ambasadori i Francës në Kosovë, Olivier Guerot, ka mirëpritur vendimin e Qeverisë së Kosovës për heqjen e letrave ngjitëse në targat e Serbisë.
Guerot ka thënë se heqja e stikerëve lehtëson jetën e qytetarëve në Kosovë dhe Serbi. Kjo pasi një vendim të tillë e ka marrë edhe Serbia ditë më parë.
“Nuk ka më nevojë për letra ngjitëse në targat e Kosovës dhe të Serbisë. Mënyrë e mirë për të nisur vitin, duke ua lehtësuar jetën qytetarëve të të 2 vendeve”, ka shkruar ai.
Ambasadori francez më tej ka thënë se ky është një shembull i mirë për zbatimin e marrëveshjeve të tjera të arritura mes 2 vendeve shkruan Telegrafi.
Serbia ka vendosur t’i lejojë automjetet me targa RKS të lëvizin lirshëm në territorin e saj nga fillimi i kësaj jave. Ndërkaq, Qeveria e Kosovës ka vendosur në një mbledhje elektronike të enjten që të largohen stikerat nga veturat me targa të Serbisë.
