Dushan Janjiq nga Forumi për Marrëdhënie Etnike theksoi se është rregulli që në negociata të 2-ja palët të jenë të kënaqura, duke shtuar se në rastin e negociatave ndërmjet Beogradit dhe Prishtinës, vetëm pala kosovare është e kënaqur, transmeton InLajmi.
“Sa i përket rezultateve, shqiptarët dhe Qeveria e Kosovës tani po festojnë dhe janë të kënaqur, serbët dhe Serbia ndihen të mashtruar dhe humbës, e disa edhe të tradhtuar. Prandaj kjo është arsyeja pse procesi nuk funksionon tek asnjëra palë”, ka thënë Janjiq në emisionin “Mes nesh” në Tv Nova.rs.
“Lind pyetja pse hyrja e forcave të sigurisë dhe gjithë lëvizjet e ushtrisë dhe policisë nisi në qershor të 2022. Për çfarë ishte? Ata që pëlqejnë teoritë e konspiracionit do t’ju thonë se gjithçka ishte e orkestruar që Vuçiqi të kishte një alibi se ai provoi gjithçka dhe tani po dorëzon gjithçka. Mendoj se çështja është shumë më e komplikuar dhe se gjithçka është vendosur me Banjskën”, ka shtuar ai.
Janjiq vlerësoi se Banjska është “fundi i një politike”.
“Banjska, pa marrë parasysh se kush e planifikoi dhe si ishte planifikuar, përfundoi me dështim dhe ky ishte fundi i një politike që kishte Beogradi, e cila është kombinimi i presionit, kërcënimeve dhe zvarritjes”, vlerësoi ai.
“Përderisa njerëzit përballeshin me frikën se a do të ketë luftë dhe nëse Milan Radoiçiq do të përgjigjet, deri atëherë luftëtari i madh për çlirimin e Kosovës Petar Petkoviq po e përfundonte me shpejtësi, si Vuçiq, “Udhërrëfyesin”. E shohim që është dorëzuar saktësisht sipas “Udhërrëfyesit”, shtoi ai. /InLajmi/
