Gazetari shqiptar në Londër, Daut Dauti për vizitën e ministrit të Jashtëm të Mbretërisë së Bashkuar, David Cameron në Kosovë, ka thënë se i njëjti e rikonfirmoi mbështetjen britanike ndaj Kosovë.
Daut Dauti, gazetari shqiptar në Londër, në emisionin “FIVE” në RTV Dukagjini, për vizitën e ministrit të Jashtëm të Mbretërisë së Bashkuar, David Cameron, në Kosovë, ka thënë se nuk sjell asgjë të re, por është e jashtëzakonisht e rëndësishme.
“Nuk sjell asgjë të re sepse David Cameron rikonfirmon edhe një herë politikën e jashtme të qeverisë britanike ndaj Kosovës, që është politikë e një miqësie të ngushtë”, ka thënë Dauti.
Dauti ka thënë se Britania e Madhe ende paraqitet si mikja më e ngushtë e Kosovës në Evropë.
“Në njëlloj mënyre luan rolin e një protektori apo mbrojtësi të Kosovës dhe kjo është shumë me rëndësi”, ka thënë tutje gazetari shqiptar në Londër.
Sipas gazetarit Dauti, çështja e sigurisë e bën shtetin britanik të interesohet për Ballkanin.
“Qeveria britanike si primare e ka marrë vizitën e trupave britanike në Kosovë dhe pastaj takimet e tij me udhëheqësit e Kosovës. Do të thotë çështja e sigurisë është ajo që e bën shtetin britanik të interesohet për Ballkanin”, ka shtuar ai.
Ndërsa për deklaratën e ministrit të Jashtëm të Serbisë, Ivica Daçiq, për vizitën e Cameron-it në Kosovë, Dauti është shprehur se gjuha e tij nuk lejohet të përdoret në diplomaci.
“Është shumë e çuditshme një gjuhë e tillë. Ndoshta po duket në vitet e fundit superfuqitë nuk janë duke ia marrë për të madhe Serbisë çfarëdo që ajo thotë, përndryshe po të ishte ndodnjë shtet tjetër do t’i dilte problem në qeverinë britanike. Nuk besoj se do të reagojë askush për këtë punë”, ka shtuar tutje Daut Dauti.
Ministri i Jashtëm i Mbretërisë së Bashkuar, David Cameron, ka vizituar sot Kosovën dhe është takuar me presidenten e vendit, Vjosa Osmani dhe ministren e Punëve të Jashtme dhe Diasporës, Donika Gërvalla.
Cameron ka thënë se Britania e Madhe vazhdon ta mbështesë, ta ndihmojë dhe ta promovojë Kosovën, në të gjitha mënyrat që mundet.
Në një konferencë të përbashkët me ministren e jashtme, Donika Gërvalla, në Prishtinë, Cameron ka theksuar se Britania do të ndihmojë në betejën për tu njohur në forume ndërkombëtare.
