Për të mbuluar deficitin buxhetor, paguar borxhet e vjetra dhe për të financuar disa projekte, qeveria planifikon të marrë 415,2 miliardë lekë hua këtë vit.
Sipas planifikimeve të Ministrisë së Financave dhe Ekonomisë, pjesa më e madhe e huave, mbi 378 miliardë lekë, pritet të merren brenda vendit me anë të titujve qeveritarë. Me anë të një Eurobondi, pritet të sigurohen edhe 36,6 miliardë lekë të tjera.
Kthyer tashmë në të zakonshme, bonot e thesarit 12-mujore pritet të jenë instrumenti me anë të së cilit qeveria të sigurojë pjesën më të madhe të huamarrjes gjatë vitit 2024, me mbi 198 miliardë lekë.
Pjesa tjetër e parave do të merren kryesisht me bono thesari 2 dhe 5-vjeçare.
Bazuar edhe te plani i shlyerjes së detyrimeve të vjetra, Financat parashikojnë që për një pjesë të mirë të huasë të dilet në tregje në muajt janar e shkurt. Nga marsi në qershor pritet të merren rreth 130 miliardë lekë. Kalendari i huamarrjes vijon me rreth 121 miliardë lekë për gjysmën e 2-të të vitit, shkruan A2CNN.
Gjatë vitit 2023, qeveria mori rreth 200 miliardë lekë hua në tregun e brendshëm me anë të titujve qeveritarë dhe një eurobond 600 milionë euro në tregjet e huaja.
