KFOR-i bëri të ditur se ushtarët italianë sot do të kryejnë stërvitjen e tyre vjetore në komunën e Zubin Potokut, në Veri të Kosovës.
Në stërvitjen në Liqenin e Ujmanit do të përfshihen edhe varkat. Në një deklaratë, KFOR-i thekson se ky mision paqeruajtës, i udhëhequr nga NATO dhe i përbërë nga anëtarë të 27 vendeve, ka mbajtur një prani të qëndrueshme në Kosovë që nga viti 1999, në përputhje me Rezolutën 1244 të Këshillit të Sigurimit të OKB-së, transmeton Front Online.
“Misioni i KFOR-it dhe Komandës Rajonale është që në mënyrë të paanshme të ruajnë një mjedis të sigurt për të gjitha komunitetet që jetojnë në Kosovë, duke siguruar paqen dhe stabilitetin në rajon”, thuhet në deklaratë.