Kryeministri Edi Rama nuk komentoi vendimin e GJKKO-së për dhënien e masës “arrest në shtëpi” për ish-kryeministrin Sali Berisha.
Në konferencën tradicionale të fundvitit i pyetur nga gazetarët, Rama theksoi se arrestimi i kujtdo nuk konsiderohet fitore për një forcë politike.
“Kurrë nuk është fitore e një partie arrestimi i dikujt të cilësdo parti. Kjo është në parim. Partitë fitojnë zgjedhjet për të çuar para vendin. Dhe partitë nuk janë organizata luftarake që funksionojnë për të eliminuar kundërshtarët, në një mënyrë apo tjetër. Nuk e shoh si një fitore të PS apo edhe të Erionit apo Taulantit që kanë bërë më këmbëngulje dhe pasion detyrën e tyre. Kjo është diçka që nuk ka lidhje fare me dëshirën, objektivin e nevojën për të parë si fitore faktin që cilido qoftë vihet nën trysninë dhe në masat e drejtësisë”, u shpreh Rama.
Ashtu sikundër, vijoi ai, nga ana tjetër nuk do të ketë drejtësi në Shqipëri deri kur të gjykohet 21 janari.
“Pa u gjykuar 21 janari dhe pa u vënë para drejtësisë vrasësit dhe urdhëruesit e tyre, që janë vrasësit e vërtet të 21 janarit drejtësia do të jetë e gjymtuar moralisht dhe e pamjaftueshëm sa i përket fuqisë së saj”, tha ai.
Për kryeministrin Rama, 21 janari dhe gjykimi i 21 janarit, do të vendosin një gurë të palëvizshëm për deri ku mund të shkojë ushtrimi i forcës represive të shtetit, si rezultat i abuzimit me të, nga persona të veshur me pushtet, shkruan ATSH.
“Këtë e kam në parim. Për rastin konkret nuk kam asnjë koment”, theksoi ai.
