Kryetari i Aleancës për Ardhmëri të Kosovës, Ramush Haradinaj uroi ushtarët e rinj që iu bashkuan FSK-së teksa thotë se ndjehet i mahnitur nga gatishmëria e të rinjve për ti shërbyer atdheut, përcjell InLajmi.
Pavarësisht kësaj, Haradinaj shprehu shqetësimin e tij për atë që ai e cilëson si një trajtim jo të dinjitetshëm të Forcës nga Qeveria aktuale.
Ai tha se në vitin 2024, FSK po shkon me më pak buxhet për armatim, municion e mjete të tjera ushtarake.
Tutje, kryetari i AAK thotë se pavarësisht vullnetit qytetarë për të shërbyer duhet edhe përkushtim serioz nga ana e Qeverisë për sigurinë e vendit.
Postimi i plotë i tij:
Është mahnitëse gatishmëria e të rinjve tanë për të shërbyer për Atdheun. Sot u certifikuan edhe 325 ushtarë të rinj. Me këtë rast, uroj shumë suksese për ta, në këtë rrugë fisnike.
Me përkushtim të madh, kam qenë gjithmonë në përkrahje të Forcave të Sigurisë, e po me atë përkushtim, ngritëm statusin e Forcës në Ushtri, me përkrahje të aleatëve. Por, sot ndjehem i shqetësuar për trajtimin jo të dinjitetshëm të Forcës nga qeveria aktuale. Me dhjetëra miliona euro të buxhetit, u humbën këtë vit, për shkak të papërgjegjësisë qeveritare.
Këto veprime të Qeverisë, cungojnë kapacitetet tona të sigurisë. Kosova do të hyjë në vitin që po vjen, me 58 milionë euro më pak armatim, municion e mjete ushtarake. Përpos vullnetit qytetar për të shërbyer, siguria e vendit kërkon përkushtim madhor dhe serioz të qeverisë. /InLajmi/
