Superliga e Evropës ka shkaktuar një situatë jo normale në ligat kryesore të futbollit dhe jo vetëm, në kontinentin e vjetër. Një pjesë e ekipeve refuzuan kompeticionin e ri, ndërsa ka ende nga ato të cilat janë të bindura se është zgjidhja e duhur. Kujtojmë se pak ditë më parë, Superliga Evropiane fitoi betejën me UEFA-n dhe FIFA-n dhe ka të drejtën të krijohet, duke i hapur kështu rrugë nisjes nga puna.
Në këtë situatë UEFA ka bërë çmos që ekipet të mos i bashkohen këtij plani edhe pse duket e vështirë për faktin se financat e tyre janë shumë të larta. Në lojë janë futur dhe federatat e ndryshme të futbollit, të cilat u kanë bërë presion ekipeve të tyre. E fundit është ajo e Federatës Italiane të Futbollit, e cila ka kërcënuar çdo skuadër se në rast se i bashkohet Superligës së Evropës, atëherë do të përjashtohet nga kampionati italian, shkruan Euronews.al
Në vendimin e publikuar prej tyre, skuadrat pjesëmarrëse të Serisë A, do të mund t’i bashkohen vetëm kompeticioneve që mbajnë logon e UEFA-s dhe FIFA-s. Pra një masë e tillë i step ato që t’i bashkohen Superligës, ndërsa masa të tilla pritet të merren dhe në liga të tjera, ku deri më tani, asnjë federatë nuk ka dhënë miratimin që skuadrat e saj t’i bashkohen këtij projekti inovativ.
