Në konferencë të fundvitit, shefi i Grupit Parlamentar të AAK-së, Besnik Tahiri ka thënë se viti 2023 do të mbahet në mend si vit i cili e varfëroi secilin qytetar të Kosovës përcjell InLajmi.
Tahiri thekson se ishte vit i eksperimentimit të shumicës së ministrave dhe dikasterëve që udhëheqin, duke e e kthyer Kosovën ndër vendet e para në listë për rezultatin më të dobët në PISA.
Shefi i Grupit Parlamentar të AAK-së tha se Zhvillimi më i mirë dhe më i mrekullueshëm ne 2024 do të ishte largimi i kësaj qeverie dhe ndalja e dëmit që i bëhet Kosovës.
Postimi i plotë i tij:
2023 vit i humbur për Kosovën!
Në konferencën e fundvitit duke e rikapitulluar vitin 2023, theksova rolin e AAK-së në këtë vit, por njëkohësisht edhe dështimet të cilat ndodhën gjatë këtij viti.
Viti 2023 do të mbahet në mend si vit i cili e varfëroi secilin qytetar të Kosovës, pa dallim. Vit i cili e ngriti pasigurinë në vend, që nga aspekti social e deri tek ai i sigurisë.
Ishte vit i eksperimentimit të shumicës së ministrave dhe dikasterëve që udhëheqin, duke e e kthyer Kosovën ndër vendet e para në listë për rezultatin më të dobët në PISA, në vendin me pagat më të ulëta në sektorin publik në rajon, në mos shpenzimin respektivisht investimin e jo më shumë se një miliardë euro në projekte kapitale dhe me dështim të plotë në politiken e Jashtme dhe subjektivitetin e Kosovës.
2023 do të mbahet mend si vit kur qeveria është munduar me të gjithë mekanizmat e saj të kapë institucionet e pavarura, në veçanti gjyqësorin.
Zhvillimi më i mirë dhe më i mrekullueshëm ne 2024 do të ishte largimi i kësaj qeverie dhe ndalja e dëmit që i bëhet Kosovës. /InLajmi/
