Në konferencën e fundit për këtë vit Ministri i Mbrojtjes, Ejup Maqedonci, tha se Forca e Sigurisë së Kosovës, është e gatshme që ta mbrojë vendin dhe sovranitetin, raporton InLajmi.
Maqedonci tha se vendosja e xhandarmërisë serbe në kufirin me Kosovës paraqet rrezik për sigurinë dhe stabilitetin, por ai pohoi se bashkë me KFOR-in po koordinohen që kjo qasje agresive e Serbisë të minohet, por tha se janë duke ndërtuar edhe kapacitet e FSK-së.
Ministri i Mbrojtjes përmendi të arriturat gjatë vitit 2023 si dhe planet 2024 duke theksuar se arritja më e lartë e këtij viti është buxheti, e që nga buxheti fillestar ka arritur vlerën 201 milionë euro, standard i kërkuar për vendet e NATO-s
“Ajo që mund te them është se FSK-ja ka të gjitha elementet për mbrojtjen e vendit dhe si sovranitetit. Vendosja e xhandarmerisë serbe në kufi, vet prezenca e 3 brigadave paraqet kërcenim për vendin tonë dhe është pasojë e bazamentit të rrezikshmërisë, duke nisur nga Kushtetuta e saj që Kosovën e njeh si pjesë e shtetit të saj. Ne jemi në koordinimin me KFOR-in për zbutje e situatës nga kjo qasje, por jemi duke ndërtuar edhe kapacitetet tona” tha ai.
Maqedonci përmendi rekrutimin e 1.838 pjesëtarëve të rijnë, ngritjen e pagave te gradave e ulëta, shkollimet jashtë vendit etj. Po ashtu, ai përmendi edhe rritjen e buxhetit për armatim ku do të investohen 28% më shumë se sivjet, ku ka thënë se i kanë harxhuan 239 milionë euro.
“Arritje shumë e veçantë është investimi në sisteme të armatimit, me një buxhet që ka shënuar rritje mbi 100% në raport me vitin 2022, është investuar 28% më shumë në blerjen e armatimit gjatë këtij viti, apo nga përafërsisht 4 milionë që janë investuar në qeverinë e kaluar në sisteme të armatimit, shifra ka arritur në 239 milionë euro investime në sisteme të armatimit” tha Maqedonci.
Maqedonci u shpreh se te ngritja e pagave ka pasur zhvillim pozitiv, kemi ngritje te pagave, sidomos tek pjesa e gradave të ulëta, ku përfshihen ushtarët, tetarët e karrierës dhe tetarët me gradë.
“Te ngritja e pagave ka pasur zhvillim pozitiv, kemi ngritje te pagave, sidomos tek pjesa e gradave të ulëta, ku përfshihen ushtarët, tetarët e karrierës dhe tetarët me gradë. Republika e Kosovës është ngritur 5 vende më lartë në indeksin ndërkombëtar për mbrojtje globale, arritje e lartë” tha ai.
Maqedonci potencoi se objektiv strategjik mbetet integrimi në NATO, për çka tha se janë bërë hapa konkret.
