Presidenti i Republikës Srpska Milorad Dodik emëroi Aleksandar Vulin anëtar të Senatit të Srpska, transmeton InLajmi.
Në vendim thuhet se në bazë të Kushtetutës së Republikës Srpska dhe Ligjit për Senatin, Vulin emërohet senator i Republikës Serbe nga një dhjetori,
Ky vendim do të publikohet në Gazetën Zyrtare të Republikës Srpska.
Fjala vjen, Senati i Republikës Srpska është, siç thuhet në uebsajtin e tyre, organi këshillues i institucioneve më të larta kushtetuese të Republikës Srpska.
Senati ka deri në 55 anëtarë të emëruar nga Presidenti i Republikës Srpska. Anëtarë të Senatit emërohen figura të shquara të jetës publike, shkencore dhe kulturore. Senatori emërohet për 7 vjet, me mundësi emërimi për një mandat tjetër radhazi, shkruan RTRS.
“Seancat e Senatit thirren dhe kryesohen nga Presidenti i Republikës Srpska. Senati konstituohet dhe fillon punën kur Presidenti i Republikës emëron të paktën gjysmën e numrit të përgjithshëm të senatorëve. Presidenti i Republikës është anëtar i Senatit, mandati i të cilit fillon me zgjedhjen në detyrën e Presidentit të Republikës dhe mbetet anëtar i Senatit edhe pas përfundimit të detyrës së Presidentit. Organizimi dhe mënyra e funksionimit të Senatit është e rregulluar me Ligjin për Senatin e Republikës Srpska”, shkruhet në ueb faqen e Senatit/InLajmi/
