Më 27 dhjetor të vitit 1899 lindi kolosi i letrave shqipe, poeti, shkrimtari e përkthyesi Llazar Gusho, i njohur si Lasgush Poradeci.
Njeriu që i këndoi si askush tjetër liqenit e ndjenjave njerëzore, edhe sot, në këtë 124 vjetor të lindjes, vazhdon të jetë krenaria e qytetit të tij, Pogradecit por edhe e gjithë shqiptarëve.
Ai lindi në një familje me tradita atdhetare. Në moshën 10 vjeçare shkoi për studime në Manastir dhe më vonë në Athinë, ku mbaroi liceun.
Më 1921 ai shkoi në Rumani, për të ndjekur studimet e larta. Në Bukuresht ai u lidh me Lëvizjen Atdhetare të Kolonisë Shqiptare, u miqësua me Asdrenin e atdhetarë të tjerë shqiptarë dhe u zgjodh edhe sekretar i përgjithshëm i Kolonisë. Në verën e vitit 1924 Qeveria e Fan Nolit i dha bursë dhe kështu arriti t’i përfundojë studimet e larta në Grac (Austri) në Fakultetin e Filologjisë Romano-Gjermane.
Ai është nga lirikët tanë më të mëdhenj, i cili u shqua për sensibilitetin dhe ëmbëlsinë poetike me të cilën i këndoi Shqipërisë dhe dashurisë.
Lasgushi nuk bëri kurrë kompromise me artin e tij, duke i kushtuar kjo një gjendje jo të mirë ekonomike dhe indiferentizëm nga shtypi zyrtar i kohës.
Pas vdekjes së poetit (12 nëntor 1987) dhe ndërrimit të sistemit, vargu Lasgushian është dhe vijon të jetë ushqim për brezat.
Poradeci është autor i 2 vëllimeve me poezi “Vallja e yjeve” më 1933 dhe “Ylli i zemrës” më 1937, botuar në kryeqytetin rumun. Autor i më se 100 poezish, një pjesë prej të cilave edhe poezi dashurie. Pëlqyes i fjalëve arkaike, shprehive popullore po aq sa i fjalëve të reja dhe eksperimenteve leksikore. Kuteli që i redaktoi “Yllin e zemrës” e quajti “Poeti i vetëm shqiptar që mendoi, foli dhe shkruajti vetëm në gjuhën shqipe”.
Për Lasgushin është shkruar dhe ka patur botime të panumërta. Kanë shkruar historianët e letërsisë, kritikët, eseistët, gjuhëtarët, pedagogë, shkrimtarë e gazetarë.
Një vit më parë, për të nderuar figurën e poetit të liqerit, falë një fondi të posaçëm, Ministria e Kulturës dakordësoi me pasardhëset e Lasgush Poradecit, blerjen e bibliotekës personale të tij, për ta bërë pjesë të Bibliotekës Kombëtare.
Gjithsej 650 tituj librash në gjuhë të huaj, por edhe shqip, që janë përdorur nga poeti, qe mbajnë shënimet e tij apo autografët e dhuruesve, shkruan ATSH.
Një bibliotekë e paçmueshme, që tashmë i shërben studiuesve dhe studentëve.
