Ministri i Bujqësisë, Pylltarisë dhe Zhvillimit Rural, Faton Peci ka mbajtur konferencën përmbyllëse të vitit gjatë së cilës e ka konsideruar vitin që po lemë pas si një vit të suksesshëm për bujqësinë në Kosovë, raporton InLajmi.
Ai u shpreh se gjatë vitit 2023 janë miratuar 491 projekte të granteve e ndërkohë 31.000 fermerë kanë përfituar prej subvencioneve me vlerë prej mbi 61 milionë eurosh.
“Nëse vitit 2023 i vendosim një shifër për bujqësinë, ajo është vlera prej 85 milionë eurosh përmes së cilës është shpërblyer puna dhe mundi i bujkut tonë të vyer. Në kuadër të kësaj, janë miratuar 491 projekte të granteve në vlerë prej 24.2 milionë eurosh ndërsa 31.000 është numri i përfituesve të subvencioneve në vlerë prej mbi 61 milionë eurosh”, tha Peci.
Gjithashtu në këtë konferencë, ministri ka treguar edhe për marrveshjet të cilat Qeveria ka miratuar në mbështetje të këtij sektori siç janë bashkëpunimi me Qeverinë gjermane dhe grantet nga Komisioni Evropian.
“Kemi Ratifikuar në Kuvend Marrëveshjen mes Qeverisë së Kosovës dhe Qeverisë gjermane në vlerë prej 20.2 milion euro për grante në agroturizëm, ekoturizëm dhe zhvillim rural nga të cilat 10.2 milionë janë financim i Qeverisë së Gjermanisë. 9.2 milionë euro është vlera e grantit nga Komisioni Evropian për investime e ngritje të kapaciteteve në sistemin e ujitjes për vitet e ardhshme. Ndërsa 7 milionë është vlera me të cilën do të përkrahet Agjencia për Zhvillimin e Bujqësisë, për procesin e akreditimit që do të fillojë gjatë Janarit/Shkurtit të vitit 2024”, tha ministri.
Më tutje gjatë konferencës, ministri Peci foli edhe rreth mbështetjes që iu është dhënë grave në këtë sektor. /InLajmi/
