Në mbledhjen e planifikuar të mbahet sot, KQZ do të shqyrtojë 2 rekomandime të Zyrës për Certifikim, Regjistrim dhe Kontrollin Financiar të Partive Politike, lidhur me pezullimin e partive politike Lëvizja për Bashkëveprim dhe Partia Socialdemokrate.
Sipas KQZ-së, arsyeja e pezullimit të këtyre 2 partive politike vjen për shkak se ato nuk mbajtën kuvendet e tyre zgjedhore brenda afatit ligjor.
Por një gjë të tillë nuk e shohin shqetësuese në Partinë Socialdemokrate.
Zëdhënësja e PSD-së, Natyra Kuçi i ka thënë Telegrafin se “nuk ka vend për shqetësim”.
“Ka të bëjë me disa procedura teknike të cilat gjatë afatit 45 ditësh do t’i rregullojmë. Në janar PSD do të mbajë Kuvendin e saj, sipas afatit të rregullt dhe të monitoruar nga KQZ”, ka thënë Kuçi.
Ajo ka shtuar se për afatet dhe detajet që lidhen me mbledhjen e Kuvendit zgjedhor do të njoftoheni me kohë.
Sipas sqarimeve nga KQZ, partitë politike të regjistruara në Kosovë, e kanë për obligim ligjor që të mbajnë kuvendin zgjedhor brenda 6 muajve nga data e regjistrimit të partisë dhe pastaj së paku çdo 48 muaj.
