Ish-kryediplomati, tani nënkryetar i Kuvendit Enver Hoxhaj ka kritikuar Qeverinë për faktin se ka injoruar kushtin e BE-së për marrëveshjen me Serbinë, përcjell InLajmi.
Sipas Hoxhaj këtë vit Qeveria e Kosovës hoqi dorë nga ky kusht pasi pranoi një marrëveshje që nuk është ligjërisht e detyrueshme dhe nuk ka njohje të ndërsjellë.
Në reagimin e tij, Hoxhaj rikujtoi edhe humbjen e ish-ministrit të jashtëm të Gjermanisë Guido Westerwelle i cili dha një mbështetje të madhe për Kosovën dhe luajti një rol kyç në vendosjen e kushtit gjerman që më vonë u kthye në kushtin e BE për një marrëveshje ligjërisht të detyrueshme për Serbinë.
Postimi i tij i plotë:
Një dekadë më parë, ne humbëm një mik të madh, ish-ministrin e jashtëm të Gjermanisë, Guido Westerwelle. Ai i dha mbështetje të jashtëzakonshme Kosovës së pavarur dhe personalisht e di që luajti një rol kyç në vendosjen e kushtit gjerman, dhe më vonë kushtit të BE-së, “marrëveshjes ligjërisht të detyrueshme” për Serbinë, një kusht nga i cili hoqi dorë këtë vit Qeveria e Kosovës duke pranuar një marrëveshje që nuk është as marrëveshje ligjërisht e detyrueshme dhe as nuk ka njohje të ndërsjellë! /InLajmi/
