Partia Demokratike e Kosovës dorëzoi në Gjykatën Kushtetuese Ligjin për Fondin Sovran, i cili vlerësohet të jetë ligj diskriminues dhe jashtë parimeve të sundimit të ligjit, raporton InLajmi.
Pas dorëzimit të ligjit për interpretim nga Gjykata Kushtetuese, deputeti PDK-së, Ferat Shala tha se Qeveria përmes këtij ligji po orvatet të vendosë një superstrukturë për të krijuar pabarazi dhe për të hapur linja tjera të kontrollit mbi asetet publike.
“Ne sot po e fillojmë këtë proces politik dhe jemi të bindur se do të duhej të kthehej apo të suprimohej ky ligj tashmë i miratuar dhe t’i kthehemi normalitetit ekonomik të vendit, sepse kjo Qeveri po orvatet që me ligje të tilla diskriminuese të pabarabarta të kapë të resurset, asetet dhe ndërmarrjet, të cilat de fakto dhe de jure i menaxhon vet”tha Shala.
Shala shprehet se PDK konsideron se me Ligjin për Fondin Sovran , po krijohet një institucion jashtë parimeve të sundimit të ligjit.
“PDK vlerëson se me Ligjin për Fondin Sovran po krijohet një institucion jashtë parimeve të sundimit të ligjit, dhe kërkesa për vlerësimin e këtij ligji e pamundëson dekretimin e tij nga ana e presidentes”, tha ai.
Avokati Faton Fetahu tha se deputetët e Grupit Parlamentar të PDK-së qysh në fillim kanë paralajmëruar se një nismë e tillë është jokushtetuese, pasi disa ndërmarrje do t’i nënshtrohen këtij institucioni dhe kështu krijohet pabarazi juridike dhe ekonomike.
“Kemi vlerësuar se 11 nene të këtij ligji janë të papajtueshme me të paktën 7 nene të Kushtetutës dhe i tillë është edhe neni, i cili flet për rolin investues të Fondit Sovran dhe krijimin e ndërmarrjeve, të cilat janë si ndërmarrje private e të cilat do t’i mbështesë Fondi”, tha avokati.
Sipas avokatit, përzgjedhja e ndërmarrjeve të cilat do ti mbështesë Frondi Sovran krijon monopol në treg, sepse Fondi Sovran do të zgjedhë 2 ndërmarrje private, pa kushte dhe pa kritere.
“Pra, në këtë mënyrë krijon monopol në treg, sepse Fondi Sovran do të zgjedhë 2 ndërmarrje private sipas dëshirës së tij, pa kushte dhe pa kritere, do të investojë” tha ai.
Kujtojmë se ky Ligj u miratua ditë më parë në Kuvendin e Kosovës, me votat e deputetëve të partisë në pushtet. Edhe LDK-ja e ka dërguar në Gjykatën Kushtetuese këtë Ligj me pretendimet se “Qeveria Kurti po dëshiron të krijojë një super-ndërmarrje të kontrolluar shtetërore”.
Qeveria e Kosovës ka thënë se Fondi Sovran do të jetë një mekanizëm i ri dhe efektiv për orientimin e investimeve, përmirësimin e qeverisjes korporative, ngritjen e konkurrueshmërisë dhe cilësisë, rritjen e shkathtësive dhe të punësimit, si dhe eliminimit të keqpërdorimit dhe korrupsionit në sektorin e ndërmarrjeve publike. /InLajmi/
