E drejta për demonstrata paqësore duhet të respektohet, por dhuna nuk është zgjidhje dhe është e papranueshme, thonë nga Bashkimi Evropian për Zërin e Amerikës pas protestave dhe trazirave në Beograd, transmeton InLajmi.
“Veprimet e policisë duhet të jenë të përshtatshme dhe të drejtat themelore duhet të respektohen brenda shtetit të së drejtës. BE bën thirrje për paqe dhe dialog”, thuhet në përgjigjen me shkrim.
Nga Brukseli nuk kanë dashur të përgjigjen në pyetjen se si i komentojnë akuzat e autoriteteve në Serbi ndaj vendeve perëndimore pa emër për shkak të trazirave në protestat pas zgjedhjeve.
BE përsëri bëri thirrje për “një hetim të duhur mbi pretendimet për parregullsi zgjedhore”.
Misioni i huaj vëzhgues i udhëhequr nga Zyra e OSBE-së për Institucionet Demokratike dhe të Drejtat e Njeriut ODIHR deklaroi në një raport paraprak se zgjedhjet në Serbi u shënuan nga parregullsi të rënda në ditën e votimit, si dhe me kushte të padrejta zgjedhore në favor të autoriteteve.
Përfaqësuesi i Lartë i BE për Politikën e Jashtme dhe Sigurinë Josep Borej dhe komisioneri i BE për Çështjet Evropiane Oliver Varhelji njoftuan javën e kaluar se “BE përfundon me shqetësim se procesi zgjedhor në Serbi kërkon përparim të prekshëm dhe reforma të mëtejshme”.
Ata u bënë thirrje autoriteteve në Serbi që “në mënyrë transparente, të bëjnë raporte të besueshme mbi parregullsitë, duke përfshirë akuzat në lidhje me zgjedhjet lokale në Beograd dhe komunat e tjera.”
Shtetet e Bashkuara i bënë thirrje Serbisë gjithashtu që të hetojë akuzat e një misioni vëzhgues ndërkombëtar për parregullsitë në zgjedhjet e 17 dhjetorit në Serbi.
Qeveria në Serbi mohon se ka pasur parregullsi zgjedhore dhe refuzon t’i plotësojë kërkesat e opozitës dhe të një pjese të qytetarëve për rikthimin e zgjedhjeve në Beograd. /InLajmi/
