Sekretari i Përgjithshëm i Lidhjes Demokratike të Kosovës LDK Imri Ahmeti, në një prononcim për Ekonomia Online, tha se nuk i beson sondazhit të publikuar së fundi që këtë parti e nxori të 3.
Ai thotë se edhe vet kanë realizuar sondazhe të tilla dhe se e kanë të qartë gjendjen në terren. Madje thotë se ka gjasa që dikush të ketë manipuluar me rezultatet dhe se këto të fundit nuk duhet të merren afër zemrës.
“Fare nuk i besoj sepse ne kemi sondazhe që i kemi bërë me kompanitë pothuajse të njëjta kredibile pak a shumë e njohim edhe gjendjen tonë në terren”.
“Duket që dikush i ka futur duart në këtë situatë, megjithatë unë personalisht jo në kuptimin e përfaqësimit politik, po personalisht sondazhet janë çështje që nuk i duhet me i marrë shumë afër zemrës sepse janë të lëvizshme janë lehtësisht të manipulueshme të kryqëzuara sipas ambicieve që do me i prodhuar kushdo që merret me sondazhe”.
Bazuar në një sondazh të UBO Consulting, nëse zgjedhjet do të mbaheshin këtë të diel, Lëvizja Vetëvendosje LVV do të printe e para në listë, duke kryesuar me 48.5%.
Ndërsa, partia tjetër që kryeson në vend të 2 është Partia Demokratike e Kosovës PDK, me 18.2% , duke lënë pas Lidhjen Demokratike të Kosovës LDK, me 17.9%.
Pas këtyre partive pason AAK-ja, e cila rezulton të ketë 6.8%. Lista Serbe ka marrë 3.2%, ndërkaq Nisma Socialdemokrate ka marrë 1.5%.
Ndërkaq, partitë e tjera janë listuar në vende më poshtë, si Lista Guxo me 0.8%, PSD-ja me 0.4%, ndërsa Alternativa me 0.1%. Ndërsa, të tjera janë listuar me 2.6%.
