Gjatë konferncës për media, kryeministri Kurti u pyet rreth deklaratës së emisarit Miroslav Lajçak se Asocacioni është çështje e brendshme e Kosovës, raporton InLajmi.
Kurti e ka kundërshtuar këtë deklaratë duke thënë se tema e Asocacionit ka qenë gjithnjë prezente gjatë tryezave të dialogut me Serbinë. Ndërkohë ai u shpreh se gjithnjë ka pasur shumë trysni që edhe Qeveria e Kosovës të prezantojë një draft.
“Në bisedimet e Brukselit vazhdimisht është thënë që për një draft-statut duhet të ketë marrëveshje Kosovë-Serbi dhe është sjellë në tryezën e dialogut. Më 2 maj kam dëgjuar me durim ish-deputeten e SNS-së, Daniela Vujeçiq, udhëheqëse e të ashtuquajturit Ekip Menaxhues, duke e laboruar gjysmë ore se si duhet të duket Republika Serbe në Kosovë. Ka pas shumë trysni mbi qeverinë që edhe ne të propozojmë një draft, ndërsa drafti i saj s’ishte zhvlerësuar nga ndërmjetësi”, tha Kurti.
Gjithashtu Kurti vijoi të thoshte se nëse deklarata e Lajçak do të ishte e vërtetë, atëherë koha e shpenzuar në Bruksel për diskutime rreth kësaj teme do të ishte kohë e shpenzuar kot. Kjo pasi sipas tij, Kosova për çështje të brendshme ka Qeverinë e saj dhe ministrat e duhur për tu marrë me këtë temë.
“Kjo i bie që koha në Bruksel për draftin për Asociacionin gjatë këtyre 2 viteve paska qenë e panevojshme si temë, rrjedhimisht e humbur si kohë. Kjo është arsyeja pse thashë që nëse është një çështje ekskluzivisht e Kosovës, plotësisht dakord, atëherë Kosova për çështje të brendshme jo vetëm që ka Qeveri, por edhe ministra përkatës”, vijoi kryeministri.
Më tutje Kurti ka theksuar se nuk ka thënë që do ta shkruaj Asocacionin. /InLajmi/
