Me rastin e 34 vjetorit të themelimit të LDK kryetari i kësaj partie Lumir Abdixhiku ka rikujtuar historinë e themelimit të saj duke vizituar varrin e themeluesit Ibrahim Rugova, përcjell InLajmi.
Në urimin e tij Abdixhiku u shpreh se kjo parti erdhi si rezultat i dëshirës së popullit të Kosovës për tu liruar nga shtypja që po iu bëhej me në krye Rugovën.
Sipas Abdixhikut krijimi i LDK shënoi lindjen e aspiratave për një Kosovë demokratike. Më tutje në urimin e tij, ai u bëri thirrje qytetarëve që të bashkohen në rrugëtimin e ri të kësaj partie për një Kosovë të integruar në BE dhe NATO.
Postimi i tij i plotë;
34 VJET
Fundi i vitit 1989, për pjesën më të madhe të Evropës ishte periudhë e rilindjes së demokracisë e vet lirisë njerëzore si rrjedhojë natyrale e rënies së sistemit komunist e totalitar që për dekada kishte mbajtur të shtypur popuj gjithandej Evropës. Kosova, shqiptarët këtu, s’bënin përjashtim. Një muaj pas rënies së Murit të Berlinit, saktësisht më 23 dhjetor të vitit 1989, intelektual të shquar të kohës, kishin nisur rrënimin e murit të shtypjes shekullore ndaj popullit të Kosovës.
Si përgjigje ndaj thirrjes monumentale të historisë, këta themeltarë të orëve të rënda, kishin krijuar lëvizjen më të madhe e më domethënëse historike të shqiptarëve të Kosovës, kishin krijuar Lidhjen Demokratike të Kosovës. Në krye të kësaj besëlidhje e kësaj lëvizje popullore, qëndronte prijësi ynë historik, ati themeltar i shtetit të Kosovës, Presidenti historik, Dr. Ibrahim Rugova.
Lindja e LDK-së, ishte lindje e aspiratave të artikuluara politike të popullit të Kosovës për liri, për pavarësi, për demokraci. Ishte lindje e përpjekjes sonë kolektive për jetë të lirë, të dinjitetshme, të pavarur, në shtetin e Republikës së Kosovës.
Sot, në këtë 34 vjetor, uroj dhe ftoj secilin anëtar të Lidhjes Demokratike të Kosovës, secilin të djathtë, patritot e rugovist, të angazhohet në rrugëtimin tonë të ri historik; fitoren e madhe të dekadës së katërt, që përmbushë ëndrrën tonë politike të ditëve të para: Kosova një shtet i lirë, i pavarur e sovran, i integruar në Bashkimin Evropian dhe në NATO dhe me miqësi të përhershme me Shtetet e Bashkuara të Amerikës.
Aktivitetet sot i nisëm tek varri i Themeltarit; për të vazhduar me Forumin e Rinisë tek Muzeu “Shtëpia e Pavarësisë Dr. Ibrahim Rugova”.
Zoti e bekoftë Kosovën.
Zoti e bekoftë Lidhjen Demokratike të Kosovës.
Urime dita e themelimit! /InLajmi/
