Pas zhvillimeve të fundit, Leonard Ademaj, vëllai i Liridonës, ka konfirmuar se është zhvilluar një takim në Prokurorinë Themelore në Prishtinë për të diskutuar rreth këtij rasti, përcjell InLajmi.
Ai u shpreh se ky takim shërbeu për tu informuar më mirë se çfarë po ndodh me hetimet dhe se morën një siguri më të madhe që gjërat janë duke shkuar siç duhet.
Më tutje ai u shpreh se kanë besim që institucionet e drejtësisë do ta trajtojnë rastin e vrasjes së motrës së tij në mënyrë të duhur dhe profesionale.
Postimi i tij i plotë:
Sot mbajtëm takim në Prokurorinë Themelore në Prishtinë dhe u informuam rreth rastit të vrasjes së Liridonës tonë, brenda kufinjëve që lejon ligji.
Ky takim na e lehtësoi dhimbjen dhe na ofroi një siguri edhe më të madhe që hetimet janë duke shkuar mirë.
U dakorduam që tani e tutje do të kemi takime të rregullta informuese.
Ne i shprehëm falenderimet hetuesëve, prokurores së rastit dhe të gjithë prokurorëve që janë duke ndihmuar në zbardhjen e plotë të rastit.
Ne besojmë në të gjitha institucionet e drejtësisë dhe mbesim me shpresë që rasti do të zgjidhet në mënyrë profesionale. /InLajmi/
