Pas takimit me homologun e saj bullgar, në një deklaratë për mediat, Vjosa Osmani ka falënderuar Bullgarinë për përkrahjen ndaj Kosovës, raporton InLajmi.
Osmani u shpreh se shteti bullgar ka kontribuar në çdo etapë të shtetndërtimit të Kosovës si me pjesmarrjen në KFOR ashtu edhe me njohjen e pavarësisë e së fundmi me përkrahjen për anëtarësimin e Kosovës në Këshillin e Evropës.
“Bullgaria ka dhënë kontribut në çdo etapë në shtet-ndërtimin e Kosovës, si pjesëmarrje në KFOR, me njohje të shtetit të Kosovës e kështu më radhë dhe në fund me përkrahje duke votuar pro anëtarësimit të Kosovës në Këshillin e Evropës”, tha Osmani.
Më tutje presidentja shtoi se anëtarësimi në NATO i të gjitha shteteve të Ballanit është e vetmja gjë që mund të sjell paqe në rajon dhe se çdo hezitim në këtë fushë i jep hapësirë atyre që duan destabilizim.
“Vetëm anëtarësimi në NATO i gjithë shteteve të Ballkanit mund të sjell paqe në tërë rajonin tonë. Udhëheqja e guximshme e aleatëve tanë janë të nevojshme për të përshpejtuar vendet demokratike në BE dhe NATO, sepse çdo hezitim u jep hapësirë keqdashësve për ta destabilizuar rajonin dhe botën”, u shpreh Osmani.
Po ashtu gjatë fjalës së saj Osmani tha se raporti me Bullgarinë ka një rëndësi të veçantë dhe së bashku mund të ruajnë paqen jo vetëm në Kosovë, por edhe në rajon, duke e konsideruar kështu Bullgarinë si një shtet aleat. /InLajmi/
