Ministri i Mbrojtjes Ejup Maqedonci ka pritur në një takim bilateral homologun e tij slloven Marjan Sarec ku diskutuan rreth situatës së sigurisë në vend dhe në rajon, përcjell InLajmi.
Maqedonci theksoi se gjatë këtij takimi njëra nga temat e diskutimit ishte edhe sulmi i 24 shtatorit të cilin e konsideron si shqetësues për faktin se strukturat shtetërore të Serbisë ishin të përfshira. Sipas tij ky sulm është një tregues i tendencës që Serbia ka për të destabilizuar rajonin.
Më tutje, ministri i Mbrojtjes së Kosovës u shpreh se ka informuar homologun e tij rreth ecurisë së FSK dhe gadishmërin e tyre për të thelluar bashkëpunimin me forcat sllovene si dhe rikujtoi synimin e Kosovës për tu anëtarësuar në NATO. Gjithashtu kërkoi mbështetjen e Sllovenisë për anëtarësimin e Kosovës në organizatat euro-atlantike.
Ndërkohë Maqedonci shtoi se 2 shtetet janë të lidhura nëpërmjet vlerave perëndimore dhe të kaluarës së përbashkët.
Postimi i plotë i tij:
Sot prita në takim bilateral ministrin e mbrojtjes të Sllovenisë, z.Marjan Sarec.
Gjatë takimit diskutuam rreth situatës së sigurisë në vend por dhe më gjerë.
Theksova se sulmi i 24 shtatorit është shqetësues për faktin se prapa tij qëndrojnë strukturat shtetërore të Serbisë, andaj duhet trajtuar me shumë vëmendje si veprim që tregon hapur tendecën për destabilizimin e vendit, rrjedhimisht të Ballkanit Perëndimor.
Krahas situatës së sigurisë ministrin Sarec e njoftova për të gjitha përparimet e FSK-së gjerë më tani, për kapacitetet dhe vullnetin tonë për të thelluar bashkëpunimin me forcat sllovene përmes trajnimeve dhe misioneve të përbashkëta, si dhe aktiviteteve të tjera ushtarake që mund t’i zhvillojmë përtej planit bilateral.
Shpreha qëndrimin e Kosovës sa i përket luftës në Ukrainë dhe synimin e qartë që kemi si shtet për anëtarësim në BE, A5 dhe në NATO.
Nga homologu Sarec kërkova mbështetjen e Sllovenisë në rrugëtimin e Kosovës për anëtarësim në organizatat euro-atlantike, për të cilin objektiv ministri garantoi mbështetjen e padiskutueshme të shtetit slloven.
E kaluara e përbashkët dhe qëndrimi pro vlerave perëndimore janë lidhja e pashkëputshme ndërmjet dy shteteve tona. /InLajmi/
