Xhelal Jashari, nga Sindikata e re e KEK-ut, ka thënë se kërkesat e tyre të vazhdueshme janë përmirësimi i kushteve të punës dhe ngritja e pagave, e të cilat sipas tij, i janë drejtuar për më se një vit menaxhmentit dhe bordit të KEK-ut.
Jashari në “Info Plus” të RTK-së, ka thënë se të mërkurën e kanë afatin e fundit për plotësimin e kërkesave.
Nëse edhe të mërkurën, nuk ka plotësim të kërkesave, Jashari tha se do të jenë prapë në shesh me protesta, duke mos e përjashtuar mundësinë e futjes në grevë.
“Nëse nuk ka rritje të pagave për festën e Vitit të Ri ne do të hyjmë në grevë, nuk ka rrugë tjetër”, tha Jashari duke shtuar se paga është jashtëzakonisht e ulët në KEK krahasuar me djersën dhe punën që e bëjnë punëtorët aty.
“Mesatarja e pagës në KEK është afër 600 euro dhe në krahasim me punën dhe gazrat që i thithin punëtoret është jashtëzakonisht e ulët”, tha Jashari.
Tutje sipas tij vetëm brenda vitit 2021 janë mbi 36 raste të vdekjeve, e për të cilat siç shprehet Jashari dyshojnë se janë se sëmundjet i kanë marrë gjatë punës në KEK.
“Janë mbi 36 punëtor të vdekur gjatë vitit 2021 për të cilët dyshojmë se vdekja u ka ardhur për shkak të pluhurit dhe helmeve që i kanë thithur gjatë kohës së punës në KEK. Ndërsa nga 2021 e deri më tash i kemi të vdekur mbi 70-80 punëtor të vdekur nga rrezikshmëria dhe helmet e marra gjatë punës në KEK”, tha Jashari duke shtuar se punëtorëve të KEK-ut u është ulur fuqia blerëse për 30%.
“Kur them që duhet tu rriten pagat punëtorëve në KEK, kam parasysh vlerësimin e rritjes së inflacionit në vend. Duke i llogaritur të hyrat e KEK që këto vite ka dal më fitime, atëherë kërkesat tona për rritje page janë më se të drejta. Kemi edhe mungesë të madhe të punëtorëve ku një punëtorë mban 2 deri në 3 dhe 4 vende të punës brenda një ndërrimi ”, tha ai.
Madje, sipas tij, ka punëtorë që punojnë deri në 16 orë, për shkak të mungesës për t’i mbuluar shpenzimet e tyre.
Ndryshe, gjatë ditës së sotme, Sindikata e Korporatës Energjetike të Kosovës ka protestuar sërish para zyrave të KEK-ut. Sipas sindikatës, kjo protestë vjen pas dështimit të marrëveshjes mbi ngritjen e pagave për punëtorët.
