Gjatë takimit të Këshillit për Demokraci dhe të Drejta të Njeriut, kryeministri Albin Kurti ka folur rreth arritjeve të Qeverisë rreth sundimit të ligjit dhe luftës ndaj korrupsionit, raporton InLajmi.
Në fjalën e tij, Kurti tha se është bërë një progres i madh në luftën ndaj korrupsionit i cili është vlerësuar edhe nga organizatat ndërkombëtare.
Gjithashtu ai shtoi se ndonëse ka shumë informata të cilat po hetohen, aktakuzat prej tyre nuk janë të shumta.
“Progresin ynë në luftimin e korrupsionit është vlerësuar edhe nga organizatat ndërkombëtare. Ka vetëm grupe të organizuara kriminale ata nuk kanë mbështetje në popull. Ajo çfarë me duhet të theksoj se ka shumë informata për krimet vjet edhe sivjet. Ajo çfarë më duhet të theksoj është se ka shumë informata për krimet vjet dhe sivjet, vjet kur kishim barrikada paramilitare, sivjet kur kishim sulme paramilitare, por këto informata të shumta ndonëse janë shndërruar në hetime të shumta, nuk janë reflektuar në aktakuza të shumta”, është shprehur Kurti.
Më tutje kryeministri ka kritikuar mënyrën se si krimet dënohen duke thënë se dënimet e dhëna nuk i kanë dekurajuar kriminelët. Gjithashtu ai bëri kritika edhe për vonesën e shqyrtimit të ligjeve të reja nga Gjykata Kushtetuese.
“Ka pasur trajtim i cili nuk ka dekurajuar kriminelët. Në anën tjetër një sfidë si Qeveri që e kemi pasur, është fakti që reformat tona kanë përfunduar në Gjykatën Kushtetuese. Nga 16 nëntori i vitit 2022 deri më 2 nëntor të këtij viti, pra një vit minus 2 javë, i kemi 10 ligje super të rëndësishme të reformës sonë me të cilin kemi marrë besimin e qytetarëve në shkurt të vitit 2021. Ne të gjithë e dimë, Kuvendi i Kosovës e ka komisionin parlamentar për legjislacion dhe të gjitha çështjet e ligjeve të cilat sponsorizohen nga Qeveria dhe pastaj votohen nga Kuvendi, trajtohen aty, mirëpo kemi një lloj aktivizmi të çuditshëm i cili na i vonon neve reformat dhe humbet kohen e çmuar të popullit të Kosovës”, tha Kurti.
Po ashtu në këtë takim Kurti pati kritika edhe për mosngritje të aktakuzave ndaj paramilitarëve serb për sulmet e ndodhura në veri të vendit. /InLajmi/
