Pas arrestimit të aktivistes së PSD, kryetari i kësaj partie, Dardan Molliqaj ka reaguar duke e konsideruar si një lëvizje jo demokratike, përcjell InLajmi.
Në reagimin e tij, Molliqaj u shpreh se Kurti, të cilin e krahasoi me Babadimrin nuk i pëlqen kur thuhet e vërteta rreth bilancit negativ të vitit.
Ndërsa flet për bilanc negativ të performancës , Molliqaj shprehet se Qeverisja Kurti ka sjell shumë dhurata për partinë e tij, e shumë dëme për Kosovën.
Sipas tij, qeverisja aktuale po e realizon Zajednicën, po i ikën rinia.
Më tutje ai thotë se nuk ka kohë për shfaqjet festive të kryeministrit.
Postimi i tij i plotë:
BILANCI I VITIT ËSHTË NEGATIV PËR BABADIMRIN KRYEMINISTËR
Shumë dhurata për partinë, e shumë dëme për Kosovën. Po realizohet Zajednica; po dënohet UÇK-ja; po ike rinia. Nuk ka kohë për shfaqjet festive të kryeministrit!
Kjo qeveri që e kapi Universitetin, ia uli buxhetin universiteteve publike, zvogëloi pagat e profesorëve, favorizoi arsimin privat, nuk është e mirëpritur në hapësirat universitare!
Prandaj sot aktivistja e PSD-së Sonila Pllashniku ia ndërpreu fjalën Kryeministrit duke fishkëlluar në shenjë proteste dhe duke shpërndarë një fletushkë ku i listuam pikërisht dëmet e mësipërme që Kryeministri ia solli Kosovës këtë vit.
Në mënyrë të padrejtë, të papranueshme dhe tërësisht jodemokratike, Policia e Kosovës arrestoi Sonilën. Babadimri siç duket nuk e duron fjalën e lirë; nuk e duron protestën; nuk i duron fletushkat që shpalosin të vërtetën për të! /InLajmi/
