Shefi i Grupit Parlamentar të Partisë Demokratike të Kosovës, Abelard Tahiri kritikon qeverinë se ka dështuar këto 3 vite dhe se tani ka filluar të mbajë ligjërata koti se si bëhet opozita përcjell InLajmi.
Tahiri shprehet se qeveria e Kurtit po frikësohet nga kushtetutshmëria dhe ligjshmëria prandaj janë në panik.
Ai poashtu shton se në vend që t’i mbajnë ligjërata opozitës, Vetëvendosja duhet ta braktis vetë rrugën e qeverisjes korruptive dhe të dëmshme.
Postimi i plotë i tij:
Vetëvendosja, pasi ka dështuar në qeverisje në këto 3 vjet, paska filluar të mbajë ligjërata koti se si bëhet opozita. Atyre që kanë bërë opozitë me tym e flakë, me gurë e gaz, nuk po ju pëlqeka opozita jonë me rrugë institucionale, opozita jonë duke dërguar në Gjykatën Kushtetuese vendimet e tyre të mbrapshta. Ata frikësohen nga kushtetutshmëria dhe ligjshmëria prandaj janë në panik.
Në vend që t’i mbajnë ligjërata opozitës, Vetëvendosja duhet ta braktis vetë rrugën e qeverisjes korruptive dhe të dëmshme, pasojat e të cilës sot po i vërejmë me inflacionin dhe varfërimin e qytetarëve dhe nesër do t’i vërejmë edhe më qartë me ikjen masive të qytetarëve nga keqqeverisja e tyre. /InLajmi/
