Zyrtarë të 5 institucioneve në Kosovë, kanë protestuar sot para Komunës së Prishtinës për shkak të pakënaqësive me kushtet në vendin e punës.
Kryetari i Shoqatës Sindikale, Ahmet Gashi, tregoi për disa nga kërkesat primare të tyre, teksa bëri të ditur që ka shumë shërbyes civilë që në Këshillin e Pavarur Mbikëqyrës, e kanë fituar të drejtën e punës, por që lëndët e tyre zvarriten ende në gjykata.
“Kërkesa e parë ka të bëjë me hartimin e një rregulloreje për sistematizimin e vendit të punës, ku Komunës së Prishtinës i mungon kjo rregullore. Kërkesa e 2-të ka të bëjë me zbatimin e vendimeve të Kuvendit Komunal, që ndërlidhet me marrëdhëniet e punës dhe të drejtat për shërbyesit civil. Kërkesa e tretë ka qenë zbatimi i vendimeve të Këshillit të Pavarur, por shpesh edhe vendimet e Gjykatës Themelore, në marrëdhënien e punës, ku për disa vite, ka një numër të madh të shërbyesve civil që u është mohuar e drejta e tyre, e që janë degraduar. Pastaj, në Këshillin e Pavarur Mbikëqyrës, e kanë fituar të drejtën e tyre. Mirëpo, përsëri nuk janë kthyer në vendet e tyre të punës që kanë qenë dhe zvarriten në gjykata ende”, deklaroi Gashi në emisionin “Ditari”.
Më tej, Gashi tha se në mandatin e kaluar, përgjegjës që e kanë përfaqësuar Komunën e Prishtinës, e kanë vënë Gjykatën në “lajthitje”, pasi kanë thënë që i kanë zbatuar të gjitha vendimet, e që sipas tij, s’i kanë zbatuar fare.
“Nuk kemi marrë përgjigje nga komuna për këtë çështje”, potencoi tutje ai në Tëvë1.
Ndërkaq, i pyetur se a mundohet t’iu gjejë zgjidhje kryetari i kryeqytetit, Përparim Rama, ky i fundit tregoi se gjatë një takimi të mbajtur, premtimet e tij nuk kundrejt kësaj shoqate, s’janë realizuar asnjë.
“Takimin e parë që e kemi mbajtur pas 2 viteve, na ka premtuar që do t’i realizojnë këto çështje, po ashtu na pati premtuar që çdo 3 muaj të mbajmë takime të rregullta. Më pas, ka autorizuar disa persona t’i shikojnë kërkesat tona, por kur kemi kërkuar të takohemi në herën e 2-të, pas 2 jave, për t’i thënë që nuk janë duke u realizuar premtimet e tij, në fakt më nuk na ka takuar. Si pasojë e kësaj që t’i realizojmë të drejtat tona, na kanë shtyrë të marrim masa tjera sindikale, siç është greva”, theksoi ai.
Me ç’rast, Gashi tha se ende presin nga Rama që të reflektojë mbi kërkesat e tyre dhe t’i realizojë ato sa më shpejtë.
