Presidentja Vjosa Osmani, gjatë fjalës së saj në Kuvend u ndal te takimet e shumta që kishte realizuar me liderët ndërkombëtarë, raportin InLajmi.
Osmani u shpreh se nëpërmjet këtyre takimeve ka mundur që të riparojë dëmin e shkaktuar ndaj Kosovës nga armiqtë si dhe krijimin e më shumë dëmeve. Pavarësisht kësaj, ajo pranon se mbetet ende një rrugë e gjatë në avansimin e pozitës së Kosovës në arenën ndërkombëtare.
“Jam krenare për punën që kemi bërë së bashku me ekipin tim në riparimin e shumë dëmeve që janë bërë nga kundërshtarët e Kosovës dhe parandalimin e shumë të tjerave, e mbi të gjitha për punën e bërë në përmirësimin e imazhit dhe pozitës së Kosovës ndërkombëtarisht, përderisa jam e vetëdijshme se rrugë jo e lehtë na pret përpara në avancimin ndërkombëtar të vendit tonë”, ka theksuar presidentja Osmani.
Më tutje ajo shtoi se pavarësisht vështirësive të shumta, prioritet i Kosovës mbetet anëtarësimi në strukturat ndërkombëtare si BE dhe NATO.
“Njëkohësisht, dorëzimi i kërkesës se Kosovës për statusin e kandidatit në BE, vë në pah përkushtimin tonë të palëkundur ndaj integrimit dhe të ardhmes sonë evropiane. Duke pasur parasysh sfidat e sigurisë me të cilat ballafaqohet Kosova dhe i gjithë rajoni ynë, jam më e bindur se kurrë, se anëtarësimi ynë në NATO duhet të jetë prioriteti ynë numër një,”tha ndër të tjera Osmani.
Adresimin vjetor për Kuvendin të presidentes, 2 partitë opozitare AAK dhe PDK vendosën ta bojkotonin. /InLajmi/