Shefi i Ekipit Negociator të Kosovës, Besnik Bislimi, ka thënë se përgjatë negociatave në Bruksel i është thënë se në vitin 2015 ka qenë Serbia ajo që ka kërkuar verifikimin e Draftit të Asociacionit në Gjykatë Kushtetuese dhe jo kryeministri i asaj kohe Isa Mustafa. Numri 2 i Qeverisë së Kosovës ka akuzuar ish-kryeministrin Isa Mustafa se ka “manipuluar”.
Lidhur me këtë çështje ish-kreu i LDK-së i ka reaguar Bislimit përmes profilit të tij zyrtar në “facebook” duket i quajtur “të pavërteta të kulluara” deklarimet rreth Draftit dhe Kushtetueses.
Për këtë çështje ish-kreu i ekzekutivit ka folur edhe në një intervistë të shkurtër për Gazetën Express, duke thënë se nëse ndiqet kjo “logjikë” e Bislimit, atëherë do të duhej të thuhej se edhe Statutin e ri të Asociacionit ua ka diktuar presidenti serb, Aleksander Vucic, meqë në preambulë parashihet që të trajtohet nga Gjykata Kushtetuese.
“Sipas kësaj me “logjikën” e Bislimit do duhej konkluduar se edhe Statutin e Asociacionit 2023 ua paska diktuar Vuçiqi, pasi edhe aty parashihet që ta trajtojë Gjykata Kushtetuese”, ka thënë Mustafa.
Tutje ish-kreu i LDK-së ka thënë se mbase presidenti serb është tallur me Bislimit dhe tashmë numri 2 i Qeverisë së Kosovës po tallet me vetveten dhe opinionin kosovar.
Mustafa ka thënë se kur e ka propozuar klauzolën e Gjykatës Kushtetuese, Vuçiq e ka kundërshtuar duke thënë se “s’e njeh shtetin e Kosovës dhe Kushtetutën e Kosovës”, megjithatë thotë se në fund është pajtuar pas insistimit të Kosovës.
“Ndoshta Vuçiq është tallë me të në Bruksel, dhe Besniku tani tallet me vetveten dhe me opinionin. Kur unë e kam propozuar klauzolën e Gjykatës Kushtetuese, Vuçiq e ka kundërshtuar duke u arsyetuar se nuk e njeh shtetin e Kosovës dhe Kushtetutën e Kosovës. Me insistimin tonë se Asociacioni s’mund të themelohet dhe të funksionojë, nëse kontestohet kushtetutshmëria e tij, prandaj edhe dialogu bëhet i pa përmbajtje, në fund është pajtuar”, ka thënë Isa Mustafa.
Në fund Mustafa ka thënë se deklarata e Bislimit se Vuçiq “nuk iu beson politikanëve të Kosovës” por se i beson Kushtetutës së Kosovës do të kishte vlerë nëse do të ishte e vërtetë.
Mustafa thotë se është e rëndësishme që Serbia t’i besojë Kushtetutës dhe shtetit të Kosovës dhe që serbët ta pranojnë Kosovën si shtetin e tyre, por thotë se këtu qëndron problemi, prandaj sipas Mustafës “Bislimi dhe bislimat po dalin me hundë të gjatë”
“Për mua edhe bindja e Bislimit se Vuçiq nuk u beson politikanëve të Kosovës por po i “besojka” Kushtetutës së Kosovës do të ishte me vlerë nëse do të ishte e vërtetë. Me rëndësi është që Serbia t’i besojë Kushtetutës dhe shtetit të Kosovës dhe serbet e Kosovës ta pranojnë Kosovën edhe si shtetin e tyre. Por problemi është këtu, prandaj Bislimi dhe bislimat po na dalin me hundë të gjatë!”, ka përfunduar ish-kryeministri Isa Mustafa.
Bislimi në një intervistë për televizionin publik të Kosovës ka folur për Asociacionin dhe Draftin e vitit 2015, duke thënë se Vuçiq s’iu kishte besuar atë kohë politikanëve të Kosovës dhe se ishte pajtuar që Gjykata Kushtetuese e Republikës së Kosovës ta thotë fjalën e fundit për Draftin.
“Kërkesa që draft-dokumenti i 2015-ës të shkojë në Kushtetuese nuk ka qenë kërkesë e delegacionit kosovar, ka qenë kërkesë e delegacionit të Serbisë. Sepse ata kanë thënë ‘nuk iu besojmë politikanëve të Kosovës, por në atë moment kur Gjykata Kushtetuese thotë që është në rregull, ju duhet ta bëni gjithsesi’. Është manipulim i opinionit kur Isa Mustafa thotë që ‘unë e kam kërkuar nenin për ta dërguar në Kushtetuese’ për arsye se në Bruksel, në negociata, më është thënë që këtë e ka kërkuar Serbia. Ju mund ta pyesni Bashkimin Europian. Është shumë interesante dhe shumë e pakuptueshme”, ka deklaruar Bislimi.
