Partia Demokratike e Kosovës vazhdon me kritika ndaj qeverisjes së Albin Kurtit, ndërsa këtë radhë është ndalur me kritika për buxhetin e vitit 2024, i cili sipas këtij subbjekti nuk siguron zhvillim ekonomik të vendit, raporton InLajmi.
Koordinatori për Financa në kuadër të Kabinetit për Qeverisje të Mirë të PDK-së, Arben Mustafa, është shprehur se me buxhetin e planifikuar qeveria aktuale nuk garanton zhvillim ekonomik e as përmirësim të mirëqenies qytetare.
Tutje ka shtuar ai se qeveria Kurti sië ka filluar mandatin ashtu edhe do të bëjë deri në fund pa asnjë gjurmë substanciale në përmirësimin e kushteve të jetës.
“Kjo qeveri, ashtu siç e filloi mandatin, ashtu dhe po shkon drejt fundit të mandatit të saj qeverisës, duke bartur paratë e qytetarëve të Kosovës nga dora në dorë, por pa lënë asnjë gjurmë substanciale në përmirësimin e kushteve të jetesës për qytetarët e vendit. Pra, për katër vite qeverisje, kjo Qeveri pritet t’i shpenzojë deri në fund të mandatit mbi 10 miliardë euro taksa të qytetarëve, por nuk ka realizuar asnjë projekt madhor për qytetarët e vendit. Prandaj, shihet qartë se kjo Qeveri nuk ka asnjë plan për ta zhvilluar Kosovës dhe për ta përmirësuar jetën e qytetarëve”, është shprehur Mustafa të premten në një konferencë për media.
Më tej, Mustafa ka thënë se edhe buxheti për vitin 2024 është vetëm për 3% më i lartë në krahasim me buxhetin e vitit paraprak e që sipas tij kjo rritje kaq e ulët e buxhetit reflekton ngecjen e përgjithshme të ekonomisë së Kosovës gjatë kësaj periudhe.
“Buxheti i aprovuar të enjten,i ngjashëm me buxhetet e viteve të fundit, nuk ofron asnjë perspektivë për një dinamikë më të madhe të zhvillimit dhe rritjes së mirëqenies së qytetarëve të Kosovës. Në krahasim me vitet paraprake, ky buxhet dallon vetëm për sa i përket ndryshimit të strukturës së buxhetit në dëm të investimeve kapitale dhe në favor të shpenzimeve për transfere dhe subvencione”, ka thënë Mustafa.
Ai u ndal edhe tek ndarjet buxhetor ndërsa theksoi se në buxhetin për vitin 2024, shuma e alokuar për investime kapitale përfaqëson vetëm 26% të gjithsej shpenzimeve të planifikuara buxhetore, përderisa pjesëmarrja e shpenzimeve për subvencione dhe transfere ka arritur në 32.2%.
Nga gjithsej buxheti i paraparë për investime kapitale, Mustafa tha se 83% e buxhetit i takon projekteve të bartura nga vitet paraprake, ndërsa vetëm 17% është planifikuar për investime të reja kapitale në vitin 2024.
“Paaftësia e kësaj qeverie për t’i realizuar projektet ekzistuese kapitale dhe për të hartuar projekte të reja nënkupton: më pak infrastrukturë për tërheqje të investimeve dhe zhvillim të sektorit privat, më pak infrastrukturë dhe pajisje për përmirësimin e shërbimeve shëndetësore e arsimore dhe në përgjithësi, më pak zhvillim ekonomik e mirëqenie për qytetarët e Kosovës”, ka thënë Mustafa.
Koordinatori për Financa në KQM, ka thënë se orientimi kryesor i kësaj qeverie janë skemat e përkohshme dhe simbolike të subvencioneve. Tutje thekson Mustafa se Qeveria Kurti duket të jetë udhëhequr vetëm nga kalkulimet populliste për vota, dhe kjo shpërfaqet edhe me diskriminimi i paparë deri më tani në ndarjet e buxhetit ndërmjet komunave ku qeverisë Lëvizja Vetëvendosje dhe komunave që qeverisen nga partitë tjera.
“Deputetët e Grupit Parlamentar të PDK-së në seancën e së enjtes të Kuvendit kanë propozuar një numër të amendamenteve për ta ofruar sadopak këtë buxhet me nevojat reale që i ka vendi dhe qytetarët. Mirëpo, siç kanë refuzuar çdo propozim të opozitës, ngjashëm vepruan edhe dje duke i refuzuar të gjitha amendamentet e propozuara nga deputetët e opozitës”, ka thënë Mustafa.
Në mesin e amendamenteve të propozuara nga deputetët e PDK-së, por të refuzuara nga deputetët e Vetëvendosjes, ishin edhe amendamentet që kërkonin: rritjen e koeficientit të pagës për sektorin publik, sigurimin shëndetësor për Policinë e Kosovës, pensionet e parakohshme për Policinë e Kosovës dhe shumë amendamente tjera për projekte të nevojshme infrastrukturore në anë të ndryshme të Kosovës./InLajmi/
