NATO tha sot se nuk kishte asnjë informacion që tregonte ndonjë sulm të qëllimshëm nga Rusia kundër aleatëve, pasi një dron nga Rusia u rrëzua në Rumani.
Gjatë një vale sulmesh ndaj objektivave në Ukrainë u regjistruan deri në 70 dronë rusë të tipit Shahed 136, njëri prej të cilëve, sipas gjetjeve paraprake, shpërtheu edhe mbi hapësirën ajrore rumune.
Zëdhënësi i Aleancës, Dylan White tha sot në Bruksel se inteligjenca rumune kishte raportuar se Rusia po përdorte dronin për një sulm në infrastrukturën e portit ukrainas, shkruan ATSH.
“Ne dënojmë fuqishëm sulmet ruse kundër infrastrukturës civile në Ukrainë dhe përgjatë Danubit. Ne vazhdojmë të monitorojmë situatën dhe mbetemi në kontakt të ngushtë me autoritetet rumune”, tha ai.
