Kryetari i Aleancës për Ardhmërinë e Kosovës Ramush Haradinaj, njoftoi se u mbajt mbledhja e fundit e Kryesisë së Aleancës për vitin 2023 dhe takime të ndara pune me Aleancën e Gruas dhe Aleancën e të Rinjve, përcjell InLajmi.
Haradinaj tha se nga Aleanca e Gruas dhe të rinjtë e Aleancës u njoftuam me rezultatet e arritura për këtë vit, si në aktivitetet politike por ashtu edhe në planin e brendshëm organizativ.
Ai tha se ky vit nuk ishte aspak i lehtë sa i përket angazhimve politike dhe se në komunat që qeverisë Aleanca janë shembull i qeverisjes.
Tutje kreu i AAK-së tha se në vitin që po vjen i presin shumë punë dhe shumë sfida.
Haradinaj u shpreh duke thënë se është detyrë e tyre të ndalin këtë qeveri humbëse si në planin e brendshëm ashtu edhe në atë të jashtëm.
Postimi i tij i plotë:
Zhvilluam mbledhjen e fundit të Kryesisë së Aleancës për vitin 2023 dhe takime të ndara pune me Aleancën e Gruas dhe Aleancën e të Rinjve.
Bashkëbiseduam për zhvillimet politike dhe angazhimet në Aleancë. Nga Aleanca e Gruas dhe të rinjtë e Aleancës u njoftuam me rezultatet e arritura këtë vit, si në aktivitetet politike por ashtu edhe në planin e brendshëm organizativ.
Ky vit nuk ishte aspak i lehtë sa i përket angazhimeve politike në vend, megjithatë si Aleancë rezulton që gjatë këtij viti kemi një momentum tejet pozitiv në të gjitha nivelet.
Aleanca ka qenë konsistente në qëndrimet e veta politike, ku shumica e këtyre qëndrimeve kanë rezultuar të jenë largpamëse dhe të drejta.
Në Kuvendin e Kosovës kemi dëshmur një angazhim proaktiv në shumë tema, përfshirë edhe jashtë seancave plenare.
Nëpër komuna, aty ku qeverisë Aleanca, jemi shembull i qeverisjes. Performancë e lartë qëndron edhe aty ku bashkëqeverisim.
Jemi në konsolidim të Aleances së Gruas, e po ashtu Aleanca e të Rinjve po tregon rezultate e angazhim të shtuar.
Shohim një zhvillim të hovshëm në diasporë, një gjallëri e angazhim që Aleancën e kanë shndërruar në adresë për secilin bashkatdhetar.
Në vitin që po vjen na presin shumë punë, pasi që po shihet që do të jetë një vit me plot sfida për shtetin.
Është detyrë e jona ta ndalim këtë qeveri humbëse, si në planin e brendshëm ashtu edhe në atë të jashtëm. Si Aleancë nuk do të hezitojmë t’i ndihmojmë proceset e brendshme për të ardhur deri te ndryshimi i domosdoshëm. /InLajmi/
