Deputetja britanike Alicia Kearns ka reaguar ndaj një letre ku kërkohet heqja e masave ndëshkuese ndaj Kosovës që i është dërguar Josep Borell dhe Miroslav Lajçak, përcjell InLajmi.
Në këtë letër kërkohen përfundimi i masave ndëshkuese ndaj Kosovës dhe një investigim të plotë rreth sulmit në Banjskë dhe publikimin e rezultateve të tij.
Kearns shprehet se mbi 2 muaj kanë kaluar që nga sulmi i ndodhur nga militantët e armatosur të drejtuar nga zëvendës kryetari i Listës Serbe Milan Radoicic ku mbeti i vrarë një polic i Kosovës. Sipas saj sasia dhe lloji i armatimeve tregon që ky ishte një sulm i mbështetur nga shteti serb e për këtë gjë duhet një investigim formal.
Më tutje në reagimin e saj, deputetja britanike bën thirrje për ekstradim të Milan Radoiciq në Kosovë e gjithashtu ajo falënderon edhe kryesuesit për mbështetjen në nismën për kërkesën që BE të ketë një qasje më të drejtë ndaj marrëdhënieve Kosovë Serbi.
Postimi i saj i plotë:
“Sot 13 kryesues të Komiteteve Parlamentare në Europë i bënë thirrje Josep Borrell dhe Miroslav Lajçak që të shpallin në samitin e BE – Ballkani Perëndimor:
- Përfundimin e masave ndëshkuese ndaj Kosovës dhe
- Investigim të plotë në sulmin në Banjskë dhe publikimin e rezultateve
Janë bërë më shumë se 2 muaj që kur militanë të armatosur rëndë, të udhëhequr nga ish kryetari i Listës Serbe, Milan Radoiçiq vranë një polic të Kosovës dhe sulmuan Banjskën. Sasia dhe lloji i armatimeve sugjerojnë se ka pasur mbështetje nga shteti serb. Kemi nevojë për një investigim formal dhe me rezultate publike. Milan Radoiçiq ka marrë përsipër përgjegjësinë e këtij sulmi. Ai duhet të ekstradohet në Kosovë dhe të vihet përballë drejtësisë. Nuk ka asnjë justifikim për Serbinë që të mbrojë Radoiçiq dhe bashkëpunëtorët e tij që të mos përballen me drejtësinë. Faleminderit të gjithë kryetarëve, të cilët në 24 orët e fundit u bashkuan për të nxitur BE që më në fund të implementojë një qasje më të drejtë ndaj marrëdhënieve Kosovë-Serbi. Paqja kërkon drejtësi dhe llogari dhënie, të dyja këto janë në mungesë momentalisht” /InLajmi/
